الأكثر مشاهدة

أخر المقالات

قادرون بأختلاف 15

الكاتب : shahd h. rashed


الشخص الخمستاشر هو محمود يوسف .. عنده 24 سنه و دارس بكالريوس تربيه رياضيه ...
من و هو عنده 5 سنين و هو بيلعب كونغ فو و بيحبها جدا .. أتنقل في نوادي كتير و أخد بطولات كتير محليه و مراكز متقدمه علي مستوي القاهره و الجمهوريه .. و أختار يدرس في الكليه اللي بيحبها و كابتن محمد سيف أختاره يكون متدرب معاه و مساعده كمان .. و أستمر لحد سنه 4 في الكليه و في نص السنه (2010) كان متأخر علي التمرين و ركب ميكروباص و قعد مكان التباع (ضهره للسواق) و السواق كان ماشي بسرعه جنونيه و بيتكلم في التليفون ف فاجأه محمود لقا رجله في السقف و رأسه تحت .. محسش بحاجه بعد كدا غير و هو بيفوق في المستشفي .. و طلع ان الميكروباص وقع من كوبري أكتوبر و كل الراكبين ماتوا ماعدا محمود .. و في كسر في الفقره ال12 صدريه و الاولي قطانيه .. و عمل عمليه تثبيت فقرات و الداكتره قالوا انه لو عرف يقعد علي كرسي متحرك دا يكون اعجاز اصلا ...
و قعد ينتقل من مركز تأهيل لغيره و أكتشف ان في حالات شبيها و أسوأ كمان و دا كان أمل بالنسبه له .. و زي ما ربنا ابتلاه قدر يصبره .. و محمود أخد قرار مش سهل و دخل أمتحانات سنه 4 في الجامعه عادي ...
محمود قرر قرار تاني مهم .. قرر يلعب رياضه لذوي الاحتياجات الخاصه و كان متأكد أنه هينجح فيها يمكن أكتر من الكونغ فو كمان .. من الصعوبات اللي واجهه محمود أنه ساكن في الدور التامن و منغير اسنسير و قعد سنه في البيت لحد ما المشكله دي تتحل و في السنه دي بدأ يتعلم تصميم المواقع .. و بعد زهق شويه قرر يلعب تنس أرضي و بمساعده اخوه و اصحابه بدأ يتدرب 3 مرات في الاسبوع .. بعد سنه من التدريب اتصنف الثالث علي الجمهوريه .. سافر في بطوله كينيا مع المنتخب المصري (2014) .. مش بس كدا محمود كمان بيدرس كورس Web Design .. و هيبدأ يدرس ماجيستير في كليه التربيه الرياضيه ...

و دي رساله من محمود:
" أنا بعد كل القصة دي عايز أقول اني لما كنت بلعب كونغ فو و كان مستوايا متقدم جداً كنت فاكر ان ده آخر حاجه ممكن أعملها و ان دي قمة الارادة و التحدي .. لكن بعد الحادثه وبعد كل اللي شفته أكتشفت اني مكنتش أعرف حاجه عن الأراده ولا عن التحدي! :)
وتأكد انك لازم تعرف حاجتين:
أولاً أنك تثق ثقة عمياء في ربك ...
ثانياً أنك تثق في نفسك و في ارادتك أكتر من ثقتك في الحقائق اللي قدامك ...
ثالثاً نصيحة سواء كنت من ذوي الأحتياجات او لأ لازم تلعب رياضية و ان نص ثقتك بنفسك هي من حفاظك على صحتك ... "



Facebook page: Alhassan Foundation for Spinal Cord Injury

Website: www.alhassan-foundation.org


رقم حساب مؤسسه الحسن: ٧٠٥٧٥٠ في البنك العربي الافريقي الدولي - فرع نادي الصيد

التعليقات