الأكثر مشاهدة

أخر المقالات

نصائح لتنظيم العائدين للمدرسة

الكاتب : تامر المغازي


1- المدرسة هي شغلك، هي عملك، هي وسيلتك لتعلم معظم العلوم الأساسية قبل مرحلة الجامعة، الحكمة بتقول لو ما اشتغلتوش في اللي بتحبوه يبقى عليكم أن تحبوا اللي بتشتغلوه، حبوا المدرسة عشان تحبكم هي كمان.
2- المدرسة هي المكان اللي بتقابل فيه أصدقاء جدد وزملاء أكثر، بتخرج فيها بره نطاق الحياة الأسرية، كون لنفسك صداقات تقويك وتخلي وقتك في المدرسة يمر بمتعة، صاحب ناس شبهك وماتنساش إن الصاحب ساحب، وماتنساش إن والديك من حقهم يقولوا رأيهم في صحابك الجدد ويساعدوك في إختيار الصداقات الجديدة دي لأنهم أكثر خبرة منك في الحياة وعايزين مصلحتك، إختر صحابك بعناية.
3- المدرسة ممكن تبقى جنة أو جحيم، الإختيار ده إنت شريك فيه بنسبة كبيرة، عندك أنشطة ومجالات كتيرة في المدرسة تقدر تخفف بيها من صعوبة الدراسة بالنسبة لك، شارك في الأنشطة اللي تناسبك ونمي نفسك فيها، رياضة أو أعمال فنية أو مسرح أو صحافة أو مكتبة، خليها جنة .
4- علاقتك بالمدرسين والإدارة مهمة جداً، حاول تنقل أي شكوى وماتسكتش على حاجة إنت شايفها غلط لكن انقل شكواك وملاحظاتك بطريقة تخليك تكسب وتساعد المدرسة إنها تتطور، طوَّر وغيَّر
5- مش محتاج أنصحك تحافظ على أثاث المدرسة ونظافة الجدران والأرضيات والملاعب والحدائق، بجد لو إنت مش مصدق إن دي فلوسك وإن ده بيتك اللي بتقضي فيه 14 سنة من عمرك تبقى غلطان، حافظ على بيتك.
6- على فكرة لو إقتنعت بس بالنصيحة دي أنا هكون مبسوط وراضي جداً، طعام الإفطار مهم جداً، ممكن تتخيل العربية تمشي من غير بنزين؟ طيب ممكن تتخيل الزرع يكبر من غير مية؟ لازم تاخد بالك من الأكل ونوعيته والأهم إنك تفطر قبل ما تنزل المدرسة، قوم إطمن على بنزينك
7- ماتنساش تكون مبدع، وحاول تغلف إبداعك بالسعادة، ماتمنعش نفسك من البوح بفكرة قد تراها تافهة بينما هي ممكن تحل مشكلة كبيرة ليك أو لزمايلك، حرر أفكارك.
8- استعن بالله.
9- الدروس الخصوصية عبء كبير جداً عليك وعلى أسرتك وعلى البلد كلها، حاول تقلل منها ومش هقول لك إمنعها دلوقتي فجأة لأنه مش ذنبك إنك اتوجدت في المنظومة دي، لكن حاول تذاكر لنفسك بنفسك أحياناً!
10- نظم وقتك، افهم ماتحفظش، نام بدري، حدد وقت للعب ومشاهدة التلفزيون، وحدد وقت للمذاكرة كمان عشان تبقى السنة سعيدة عليك
11- اقرأ مجلات وكتب وقصص وروايات عشان تثقف نفسك، الثقافة مهمة بجانب التعليم، ثقف نفسك.

التعليقات