الأكثر مشاهدة

أخر المقالات

مفيش .. مفيش

الكاتب : خالد حمزة

أكره قصر نظر المصريين.. من رفع أسعار البنزين والسولار والغاز والمية.. وأكره قلة صبرهم.. من الانقطاع شبه المستمر للكهرباء.. وأمقت كلامهم الكثير عن المواصلات واللحمة والزحمة.. والعيال وأم العيال.. والشغل والبطالة والتعليم اللي راح وما رجعش.. والدروس الخصوصية.. وأبجني تجدني.. والرشوة والفساد والمحسوبية والملوخية؟! والمهلبية والمهلابتية والعيشة واللي عايشنها!
وكأنهم لا عرفوا.. ولا يعرفون..
أن الحكومة هي ماما وبابا.. وأنور وجدي كمان
وأن العين.. لا تعلو أبدا علي الحاجب.. وتروح فين ياصعلوك.. بين الملوك.. والكبير كبير.. والنص نص.. ما نعرفهوش
احمدوا.. ربنا.. وأكفوا خيركم شركم
وربنا يخلي لينا.. كل الناس الحلوين
ويخلي الحكومة.. ويجعله عامر بحسها
ده اللي مالوش كبير.. بيدور له علي كبير
والحمد لله.. إننا لسه عايشين.. وبنتنفس
وبنأكل ونشرب.. زي خلق الله
ولا.. نقول كمان؟!

التعليقات