الأكثر مشاهدة

أخر المقالات

رسالة الي أحفادي في المستقبل

الكاتب : فتحي علوان

بفكّر من فترة انّي اجيب حَجَرة كبيرة و انقش عليها كلمتين لاحفادي و الاجيال القادمة من نسلي ان شاء الله .. " مصر مش ام الدنيا ياولاد ..و كل فترة كده هيجيلكم واحد ابن مره يضحك عليكم بالكلام و النحنحه و السهوكة و يقولكم انها هتبقي قدّ الدنيا ..الكلام ده مش صحيح و عمره ما هيحصل ليوم الدين ..,و اللي يعرف فيكم ياخد باسبور اي دولة تانيه يتفضّل يعملها انهاردة قبل بكره ..اللي هيفكر فيكم يخدم بلده بضمير و اخلاص هياخد خابور بيروقراطي كبير هيطلع من نافوخه فخليك في حالك و بلاش دين ام ابداع ,..كل 50 سنة هتحصل ثورة كبيرة هيشارك فيها كل الشعب ,ريّح دماغك يا حبيبي انت و هو و هي و متنزلش ..خلّيك في بيتك احسن ..اللي هيموت في الثورة دي حقه مش هيجي و اللي هيعيش مش هيتنفذ من مطالبه اي حاجه ! متخلّيش الفلوس تبقي كل همّك في الدنيا..ممكن تاخد مراتك و تعزمها علي كوزين دُرة و تحبها من كل قلبك هتلاقي حياتك جنّه المهم الحب و الاهم ان الخروج ميكونش في اوقات الحظر - آه نسيت اقولكم ان حياتكم كلها هتبقي حظر في حظر- ..نصيحتي متحاولشي تقاوم , متنساش ..لو عرفت تهجّ و تسيبها تخرب ع اللي فيها يبقي احسن - ..علي ايامكم يابني انت و هو و هي الجوامع هتكون قليلة اوي و في اماكن غريبه و بعيدة عن سكنك ..متتعبش نفسك - ممكن تصلّي في البيت علي فكرة- دخول المساجد علي ايامكم هيبقي قضية امن قومي و امن دوله و تخابر مع مكّه فمتخليش امك و مراتك يعيشوا متشحتفين عليك بقية عمرهم .., استمتعوا علي ادّ ما تقدروا ..الحياة اصلا جميلة و ربنا شايلنا - كمصريين - مصير افضل في الآخرة بس بلاش كلام في السياسة .. مفيش فايدة ! "
- ممكن الحَجَره دي تتعامل كأثَر بعد 1000 سنه مثلاً , و انا يعاملوني معامله نوستراداموس و يعرضوا الحجره بالنبوؤات اللي فيها دي في متحف خاص ..المهم ابقي سيبت للولاد اي سبوبه ياكلوا منها عيش =D

التعليقات