الأكثر مشاهدة

أخر المقالات

استعلال

الكاتب : fahd adham

لو بصيت على الدنيا بنظرة بانورامية هاتلاقى حاجة يمكن تكون موجودة فى كل الدول فى العالم, و لو فى سكان على المريخ كمان احتمال تلاقيها هناك منتشرة بينهم !!!!!!!!! العامل المشترك ده اللى مش بيفرق بين دول غنية و دول فقيرة او دول متقدمة و دول نامية يبقى بكل بساطة الاستغلال.
لما تيجى تشوف حياتك مثلا هاتلاقى الاتى :
مدرس بيحاول يستغلك و يخليك تاخد عنده درس او مجموعة.
المدرسة ذات نفسها بتستغلك علشان تجيبلهم حاجات لو حتى حنفية او لوحات للفصول.
فى حالة انك عيان و تروح المستشفى يحاولوا يستغلوك بطرق كتيييرة اقل حاجة فيها البقشيش اللى تحس انه من قانون المستشفيات.
لو عديت ثانوى عام و عاوز تدخل كلية عسكرية هاتلاقى الطريق مفروش بالورود قدامك اذا دفعت رشوة.
طبعا فى الكلية ممكن تلاقى الدكتور اللى بيجبرك تشترى كتابه علشان تنجح.
بعد التخرج بقى اذا كملت فى كليتك اساسا بتتصدم بانك مش فاهم حاجة فى مجالك اللى انت اصلا متخصص فيه فى الجامعة و بناءا عليه فمن حق صاحب الشغل اللى اتعطف و اتكرم و قبل يشغلك عنده و انت حمار انه يستغلك بابشع الطرق الممكنة من اول عدد ساعات العمل اللى بتبقى غير محددة ( نمشى لما الشغل يخلص ) لغاية انك ماتخدش اجازة لانك لو اتجرات و طلبت اجازة بيعتبروا ده ضد مصلحة العمل و طلب مشين و لا كأن اجازة دى كلمة ابيحة.
طبعا فى وسط هذا الخضم الهائل من التناحة و الاستغلال ماينفعش ننسى دور الدولة فى انها تكمل علينا و على اللى جايبينا كمواطنين غلابة بنقرف الحكومات معانا, المواطن يعتبر من ارخص الحاجات الموجودة فى البلد و المطلوب منه انه يسمع الكلام لانه غبى مش عارف مصلحته و الغريبة فى الموضوع انهم كانهم متخصصين تسويد العيشة و اللى عايشينها و ده يبان اكثر لما الحكومة تبقى مزنوقة فى قرشين تلاقيها بتلجا للمواطن اللى اصلا طالع عين اهله و كأن مفيش رجال اعمال و ناس معاهم فلوس فى البلد. انا نفسى افهم هو اى حاجة فى مصلحتنا لازم تنكد علينا و تغلى الاسعار و تشيل الدعم و تخلينا نخرس, مفيش حاجة كدة حلوة و نحبها و تبقى فى مصلحتنا برضه و لا هو لا يجوز.
ده جزء من بلاوى منيلة على المستوى المحلى و لما تيجى تبص على مستوى العالم هاتلاقى الولايات المتحدة بتستغل اى فرصة علشان تضرب اى دولة على خلاف معاها او ممكن تمثل تهديد ليها و غالبا بتبقى دولة مسلمة و هانلاقى الغرب عموما بيستغل اى فرصة علشان يتدخل فى شئون الدول النامية و بيستغلوا اى فرصة برضه علشان يهاجموا الاسلام و المسلمين, و لو رجعت بالذاكرة لورا و قرأت شوية فى التاريخ هاتلاقى كمية استغلال رهيبة للدول الافريقية و استنزاف لثرواتها بما فيهم البنى ادمين اللى اتحولوا لعبيد.
الاستغلال من اكثر الحاجات المقرفة اللى موجودة فى العالم دلوقتى و اللى للاسف تقريبا بقى جزء من روتين حياتنا اليومية و اللى بيحول الحياة من حاجة ممكن نحاول نعيشها و نتاقلم معاها لحاجة لاتطاق و عشان كده و لانى باتخنق من اى حد يستغل اى كائنات اخرى من اللى غايشين معانا على نفس الكوكب احب فى النهاية اقول لكل مستغل "حرام عليك يا اخى .... ليه كده  ."

التعليقات