الأكثر مشاهدة

أخر المقالات

سرسجى

الكاتب : fahd adham

مما لا شك فيه ان كثير منا و احنا صغيرين اتقالنا نكتب - مما لا شك فيه ان - فى موضوع التعبير علشان ناخد درجات, على العموم ده مش موضوعنا لانى مش باكتب عن فن الكتابة و لان ده اصلا مش موضوع تعبير.
اللى عايز اتكلم عنه هو مفهوم جديد نسبيا ظهر فجاة مش عارف اصله ايه بالضبط و لا جه منين لكن بما انه ظهر فاحنا مضطرين نتعامل معاه.
زمان من فترة لا باس بها كان اللى يحاول يظهر نفسه و يلفت الانظار ليه عن طريق حاجات معينة - و منها حاجات متخلفة طبعا - كنا بنقول عليه صايع و بعد شوية بقينا نقول روش اللى برضه لم تستمر فترة كبيرة علشان تحل محلها كلمة سيس و اخيرا ظهرت الكلمة الغريبة اللى هى سرسجى.
انا شخصيا مش عارف معنى محدد ليها لكن باشوف انها لايقة على بعض اصناف من الناس و هم :
- الكائن اللى بيدخل الكلية اللى اساسا مدة الدراسة فيها 4 سنين بس لكن هو يفضل مبلط و بالنسبة له عادى جدا يعنى فى ناس كثير زيه بيسقطوا برضه و بيقولوا عليها بيدبلر قال يعنى كده أشيك من بيسقط و مع تكرار فشله و خيبته المنيلة بنيلة تلاقيه بكل بجاحة و فراغة عين يطلب من ابوه المصروف كل شوية و يروح الجامعة يعمل فيها راجل و يعزم دى و يدى بقشيش لده و يجيب هدية لدى و كأنه برنس و الفلوس مش بتهمه و هو اساسا طالع عين ابوه علشان يوفرله مصروفه اللى مش عارفين هايفضل ياخده لحد امتى.
- لو تفتكروا من فترة ليست بالقصيرة ظهرت موضة عجيبة و هى انك تلبس بنطلون و تسقطه علشان تبين البوكسر اللى اسمه اساسا لباس و اللى بيبقى ملون و انتشرت بشكل كبير نسبيا بين جزء من الشباب و طبعا اثارت قرف و اشمئزاز البعض الاخر لكن بعض ما بدانا ننسى او نتناسى هذه الموضه المهببة نلاقى حاجة انيل منها ظهرت و هى ان الشباب يلبسوا لبس تقريبا تقدر تقول عليه لبس حريمى و انا شخصيا مش عارف ايه المغرى فى كده و ما كنتش مصدق الحكاية دى و فاكرها صور على الفيس و خلاص لحد ما شفتها بعينى فى الشارع هى أينعم مش منتشرة بشكل مبالغ فيه بس تبقى حاجة غريبة جدا برضه.
- لو دخلت سيتى ستارز مثلا او اى مول او رحت اى سوق هاتلاقى مجموعة معينة من البشر رايحين علشان يتفرجوا على الخلق الللى رايحين و جايين و يشتموهم و خلاص و تلاقيهم كمان بيحاولوا يعملوا اى منظر قال يعنى ما جابتهمش ولادة و هم اصلا واضحين و باين عليهم.
- فى اى كمين واقف فى الشارع ممكن تلاقى شخصية امين الشرطة او الضابط اللى بيغتت على الناس و فرحان بالبدلة اللى لابسها و فاكر انه ليه الحق انه يشتم و يضرب كمان و بيقولوله يا باشا و بعد شوية تلاقى واحد مسجل خطر جاى عليه بيصبح و يديله سيجارتين حشيش و يفضلوا يضحكوا مع بعض بشكل مثير للقرف و الغثيان.
كلمة سرسجى زى ما قلت مش عارف ظهرت امتى و لا هاتستمر لغاية امتى و يا ترى المصطلح اللى هايظهر بعدها هايكون ايه لكن فى كل الاحوال انا شايف انها كلمة غبية جدا و ان فى بعض الاصناف من بنى الانسان باحس ان الكلمة اللى انا مش فاهم معناها دى بتنطبق عليهم.

التعليقات