الأكثر مشاهدة

أخر المقالات

التقدم الى الخلف

الكاتب : fahd adham

من الحاجات الغريبة فى مصر و فينا احنا ككائنات مصرية نعيش و نتعايش مع بعض بشكل او باخر اننا بنحن للماضى بشكل تقريبا مبالغ فيه !!!!!!.
الموضوع ده كان واضح فى ال 3 سنين اللى فاتوا بعد رحيل مبارك بطريقة كبيرة يمكن علشان جه اكثر من رئيس و اكثر من وزارة .
لما وصل مرسي للحكم كان دائما عهد مبارك و طنطاوى موجودبن قدام الناس و المقارنة على طول بين طريقتهم ف الادارة و يمكن طنطاوى كان اقل واحد فيهم لانه بطبيعة الحال لم يكن رئيس دولة فعلى و نفضل نقول ايه اللى بيعملوا مرسي ده حسنى مبارك عمره ما عمل الكلام ده و لا اتصرف بالطريقة دى، ده كان بيتصرف تصرفات رؤساء فعلا لكن مرسي بيتصرف بتلقائية زيادة عن الزوم و عدم معرفة. و حتى الوضع الاقتصادى على طول كنا بنرجع لعصر مبارك و نقول كانت ايامه احسن من مرسي بكثير و كنا عارفين نمشى فى الشارع و كان فى حاجة اسمها دولة مش زى دلوقتى. و لما جه السيسى فى ناس كثير بتقول فين ايام مرسي النور عمره ما كان بيقطع كده و لا المية كانت بتقطع هى كمان ايه الضنك الى احنا بقينا فيه ده، البوليس رجع زى الاول و أنيل كل ده علشان ظلمنا الاخوان و نستاهل اللى بيحصل فينا و اللى لسة هايحصل " يسقط يسقط حكم العسكر ."
و نفس الحال أيام السادات لما كانوا بيترحموا على ناصر و انه كان زعيم بجد مش بس رئيس و مش هاستغرب لو سمعت ان فى ناس ايام ناصر كانوا بيترحموا على فاروق أيام مصر ماكانت مملكة.
الماضى واخد معانا اكثر من حقه و مش هايرجع تانى خلاص، المفروض يحصل اننا نقارن نفسنا دلوقتى بنفسنا بعد سنة مثلا و نشوف احنا هانحقق اللى احنا عايزينه فى الفترة دى و لا لا، و هل احنا كده بنحط رجلينا هلى اول طريق التقدم و لا لسة زى ما احنا .
بالطريقة دى احنا طول الوقت بنبص ورانا مش لقدام و لا حتى شايفين اللى بيحصل حوالينا فى الدول التانية اللى سبقتنا بمراحل رهيبة.
بالطريقة دى احنا نتقدم الى الخلف اللى احنا شايفينه طول الوقت و املنا نرجع زى زمان او أحسن شوية .

التعليقات