الأكثر مشاهدة

أخر المقالات

إعمل نفسك نجم

الكاتب : جمال النشار

-
في ناس كتير أوي شاغلة نفسها وبتحرق حياتها لهدف واحد بس..مين بيحبني ومين أنا عنده مهم ,,,وشايفين إن ده بيعكس تقييمهم لنفسهم وهما فين في الدنيا ...صدقني مش مهم ده علي قد ما هو مهم انت مقتنع بأيه...وهقوللك ليه..مع التدني الفشيخ في أدمغة البشر اليومين دول ..اللي بيتلفو حول الهلس والسذاحة والتفاهة ..أو الناس اللي أفكارهم بسيطة -وده مش ذم لا سمح الله- كلهم دايما بيهتمو بالمحتوي الخفيف المناسب ليهم..ودة نابع من مية ألف ظرف وحش منهم منظومة خربانة وفساد متحجر وطبقية موجودة موجودة حتي لو عملت الف ثورة !..دة بيخلي الناس غصب عنها تقول "لا بلا كلكعة و هم يابني!"...وبتلتف غصب عنها حوالين ناس أو رموز يجيدو بشدة فن النصب وبيع وترويج التوافه وبديهيات الكلام علاي إنها wow ..إن مكانش بيع الهلس والفحش هما السكة أصلا ..عودة بقي لكلامي اللي قصدت أقوله..إن مش علشان يتشوف مقياس تقييمك لنفسك هو مين مهتم بيك ومين بتابعك ومين بيجري وراك ومين أنت مهم عنده ...يبقي ده مقياس حقيقي بالعكس أبسلوتلي ..الحقيقة إن مثلا الممثل المشهور مثلا..ماهو إلا حد حوارتجي وكداب محترف - دة بجد تعريف الممثل- ..فتلاقي البنات بتموت فيه وتحبه ومش وراها غير متابعته... رغم أنها عارفه أنه بيعيش وينمو ويترعرع علي فلوسها وفلوس اللي زيها -كمعجبين وفانز- وأهتمامهم - لو مدخلوش أفلامه وتابعوه واتجننو بيه-..وبالنسبه له ميعرفش عن وجودهم سوي انهم رقم في عدد متابعين صفحته..أو صورة عالسريع بيتصورها معاها في أفتتاح الفيلم..وبيتضخم شعورهم بالعظمة من الأهتمام ده ,, وهكذا بقي قيس علي الممثلة والفنان والسياسي المشهور ومقدم البرامج والمذيعة والكاتب ..اللي النهاردة بقو - بكل أمانة- أكتر من القراء - ماهم طلعّو موضة جديدة إسمها العمق اللي زمان كنا بنقول عليها ثقافة بقي -..وكل من قرأ حاجة قوية أثرت فيه تقريبا بيحس أنه قادر هو كمان يعمل كده .. ويالا الأرزاق علي الله نضرب لنا فناجنين قهوة علي كام تراك مزيكا من اللي محدش بيسمعها كتير من اللي أعرفهم..آه وأهتم بموضوح الحشيش ده علشان الفنانين كلهم بيحششو......وغالبا الناس أياهم - بتوع مكان مخصص في الجحيم دول- بردو هما اللي بيحللو كتابات الناس وكلامهم دايما علي أنه حقد علي الناجحين المحبوبين اللي انت مش عارف تبقي منهم وزيهم فبالتالي بتسقط عليهم سوادك اللي جواك..أحب أقول أنا عارف ..وطبعا لازم أحس بكدة طول ما أنا مصدق في نفسي وواثق من أن اللي بقوله وبعمله دايما أقوي بكتير من ناس تانية واخده مكان مش مكانها لمجرد أنهم أجادو لا مؤاخذة العلاقات العامة أو استخدمو واسطة أو فلوس أو أستغلو فكرة ساذجة ولمعوها شوية ...فلسفيا من جوايا مؤمن أن ضلع مثلث الأيمان هو الرضا ..بس الرضا مش الخنوع والخضوع لوضع مقلوب ومش هينفع تقول لا أنت كدة غلطان كلها أرزاق وربنا مقسمها..علشان ده اللي جاب المجتمعات العربية الأسلامية لورا..هو عدم التفريق بين الرضا بالمكتوب وتقسيم الأرزاق..والقدرة علي التغيير وصنع المستحيلات.واتخاذ القرار والإنجاز...لأن دايما حواه مفاهيم ثابتة أنه مهما جري جري الوحوش ..غير رزقة لن يحوش ! وطبعا لكم حرية التفكير في ده أيا كانت عقيدتك وفلسفتك...ولكن بالعودة للخلف..هتلاقي إنك طول مانت مبتستناش تقيس أهميتك وجودة إنتاجك - فكريا أو فنيا بقي- بمدي أهتمام الشلة اللي حواليك ..كل ماهتختفي من دايرة الضوء تبقي مُهَمّش بيحقد علي الناس ..بس مٌهَمّش و فاهم هو مهمش ليه ...أحسن ماتكون نجم ع المسرح وانت فاكر نفسك عبقري وجامد أوي...علشان الناس ملمومة حواليك...تابع بس خناقة في الشارع هتعرف الناس بتتلم علي أيه في الغالب..علي ولا حاجة سوي الفضول الأهبل .....فهي حقيقة إذن اللي بيصنع النجم الضلمة اللي حواليه ! ولولاها مكانش هيلمع ..
‫جمال النشار‬

التعليقات