الأكثر مشاهدة

أخر المقالات

مصر يامّة يا سفينة..إركني ونزليني.

الكاتب : جمال النشار

خراب يا مصر علشان العمار خلص ومش هنعرف نبعت نجيب..سلام يا حرية ويا رأي علشان بابا سيسي يستقر بينا ...وداعا يا نضال ..علشان...لأ نضال ده جارنا وسافر الكويت بعقد سنتين ,هيضرب فيهم 1500 دينار شهريا..يعني المبلغ دة باصلاة ع الحبيب.. 37162.. جنيه...مصري..وهو خريج ايه يو سي -طبعا طبعا - !! عقبال الحبايب وكدة اللهم لا حسد - هيوحشني نضال - .....:) عارف مبتحبوش الناس المحبطة الشريرة , الطابور الخامس , الإخوان , العملاء , الماسونيين , الممولين من قوي الظلام اللي زيي..طبعا معظم شباب جيلي عارفين انا بكلم انهي شريحة !...- اهداء لتيتة وخالتو وطنط عفعاف وأونكل مازن ونحب قول له مبروك توكيل تويوتا - ومعاكم حق كجيل سابق..مستقر ..مطرمخ.. مفخّّد..عارف إن في من الجيل ده كتير مساكين وغلابة وآخرهم بطيخ في الصيف وأكلة سمك أحيانا !..بس السؤال اللي واجع لي دماغي أوي بجد ونفسي اسأله للشريحة دي..هو أنت ليه ساكت ..ومركوب..وفقير..ومسروق..وحمار ..وجاهل ومتخلف وخرسان....وساكت؟؟ مش لاقي إجابة وبتشتمني؟ ..ممكن تستعين بصديق..أو باللإعلام المصري النزيه ..الطبال ..اللي كان الأسطي "عبدة الطبال" في الراقصة والطبال اشرف منه !..خلاص والله مصدقين إن فيه فصيل سياسي\إرهابي ..سيطر ومعرفش يقلوظ العمة للشعب وجة السوبر هيرو سيسي مان - مع حفظ الألقاب - وانقذ البلد .."قال يعني"..ومصدقين كمان ان في محدثين حريات وعايزينها فوضي..وفي اطراف خفية يا سيدي أهو ولا تزعل نفسك...ده بردو أيه علاقته ان الدولة تعاقب الشعب انه ثار !!..آه في عقاب جماعي للبلد..عقاب من بتاع لما المستر يخش شايط يقوم يوقف الفصل كله ويشيله الشنط ! ومش بيفلت منه غير الأغنيا ..وقرايب الناظر...اسعار ارتفعت والقطاع الخاص مش بيزيد دخله !..والعام ياحسرة علي عينك يا تاجر...انا قولت بقي هتروق وتحلا..أقوم الاقيلك المستثمرين ورجال الأعمال عاملين من بنها ! وبساعدو الحكومة مش الشعب !!..يعني فلان اتبرع لتحيا مصر بكذا مليون..فلان اشتري بفشليون جنية شهادات القناه ..الاعلامي حمؤة الوحش بيطبل في الخلفية ...! طب فين الشعب ! الغلبان الي بيموت ده ..الضحية...ضحية وطن مختارهوش..هه؟ بتقولي حاجة يا طنط..عجلة ايه اللي هتدور وهي مين دي اللي هتروق وتحلا بالاستقرار والشغل ...هو فين الشغل؟؟! طب عندكيش واسطة ليا الله يكرمك؟؟ هم؟؟ منين يابني كان علي عيني؟؟ طب وبالنسبة لتامر ابن حضرتك خريج ادارة اعمال بفلوس ودروس ومقبول شفقة اللي اشتغل صحفي في جريدة قومية!؟؟ آه نصيب بقي مانا عارف :)..مش مهم ..ومش مهم اللي راح..ولا اللي جاي يا شعب يا منكوب...بس معلش لامؤاخذة أعطلكو سيكا...ماااااااصر يا مه يا سفيييينااا...ثقوب القاع اتسعت ارجوكي متغرقيش بينا ..هتبقي كوميديا أوي لو غرقنا ع البر....مصر يامه يا سفينة أركني هنا ونزليني الله يكرمك..اعوم وىخد فرصتي وياموت ..يا أوصل لبر آمن بعيد عن خشبك المخوخ..وعطن فسادك..وجهل ولادك..وتطرف عبادك.

التعليقات