الأكثر مشاهدة

أخر المقالات

أنجح عشر نصايح لمقالات العشر ..حاجات !

الكاتب : جمال النشار

انتشرت بقوة في الآونة الأخيرة ....طيب طيب بلاش ديباجة فصحي محنكة علشان التريقة والفراغ اللي عند بعض الناس وكدة ...بقالك قد ايه بتلاحط علي التواصل الاجتماعي مقلات وبوستات كلها بتقول " أنجح عشر طرق لكذا ...او افضل عشر خطوات لفعل كذا ..وفي منهم الفكيك أوي بقي اللي بيلونها لتصبح "الطرق العشر لتحقيق كذ..او "حقق حلمك في عشر خطوات"..هما دايما ما بين 5 لـ 10..لاحظت؟ خدت بالك وونفخت وشتمت ؟؟ وااتريقت كمان ؟؟ طب انت هنا ليه ماهو ده واحد منهم - آي والله -..بس انا النهاردة بقي جايبلك أكثر عشر حاجات تخليك تكتب بوست أو مقال عن العشر حاجات اللي فاتو دول بما انه بقي "تريند" وكله عايز يتشهر ويتعرف ويبقي كاتب عبقري او محاضر تنمية بشرية والاعلام يجري وراه ويقبض فلوس كتير ..آه طبعا سامعك ياللي بتبرطم في الآخر..آه ياخويا وأنا كمان منهم..بس يلا..هي جت عليا يعني ؟؟ بص يا سيدي..أو ياستي علشان اخواتنا الفمينست اللي لسه بيمدو ايدهم علي الشبشب..!

1- أول حاجة اختار موضوع شاغل الرأي العام...او ظاهرة أو حدث اجتماعي أو فني الناس بتتكلم عنه في المواصلات
2- أو اختار بوست "حريمي \ بناتي \ منزلي زي الريچيم أو طريقة عمل صينية النكد باللحمة البتلو أو السيلفي في المراية أو الميك آب الناسب لخطوبة مريم بنت طنط كريمة جارة خالتو عفاف......أو چورچ كلوني....علشان تضمن نسبة مشاهده عالية

3 - خش علي البوستات ذات نسبة المشاهدة العالية ودور علي اكتر تعليقات واخدة لايكات ..وانسخ منها مع التعديل لزوم الأيفيه اللي في نص نصيحة أو خطوة من العشرة .

4 - حاول تجيب مصدر مترجم للموضوع من علي جوجل لكلامك.. ولو صايع أوي خش علي بينج علشان نتايج بحثهم هي الثالثة أو الرابعة في جوجل..وأكتب قبلها "وقد ذكر موقع كذا ..أو جريدة كذا

5- قول اي نكتة سخيفة عن شخص مشهور وسف عليه..وابعد السطور عن بعضيها كدة علشان تدي " فوليوم"

6- كرر نصيحة أو اتنين منهم علشان تبقي مرح وفاني ودمك يلطش الكحل م العين وجروب كليه آداب جامعة القاهرة أو السن عين شمس يخشو يعلقو ( ومتنساش " ....." ) ويروحو كاتبينها تاني ووراها سمايلي فيس اللي مطلعة لسانها ..!

7- او انسخ عشر خطوات لحاجات اسمها ملفت بس مش هتفرق مع طبيعة الشعب المصري زي " اكثر عشر اوضاع جنسية لأرضاء زوجك\زوجتك..وكلنا عارفين ان الليله دايما آخرها الخميس بالليل عشوة لطيفة وبيبسي ووضع السحلية لما العيال تنام

8 - لو بنت مثقفة اكتبي عشر حاجات عن كلا من : التحرش , حقوق المرأه و تهميشها مع ذكر المجتمع الذكوري المتعفن , لو بنوتة كيوت من بتوع السيلفي والنسكافية واسلوب حياه اكتبي عن ارخص اماكن للتسوق او انجع طرق للحصول علي بشرة نضرة

9 - متطولش في النصايح..سطر واحد او سطر ونص آخرك علشان الملل والعناكب وماما بتحضر غدا وكدة

10 - تجاهل تماما السياسة والدين والثقافة ..علشان توصل لأكبر عدد من الناس اللي بيهتمو بالكلام ده أصلا ..

واخيرا ..لو العشر طرق دول منجحوش..مش مهم ..مفيش عشر طرق بتنجح أصلا !

التعليقات