الأكثر مشاهدة

أخر المقالات

ارحمنا يارب ...

الكاتب : محمود عدلى

النهاردة شفت حاجة غريبة و انا رايح الشغل شوفت اطفال بيكنسوا الشارع فى مدينة العبور فى عز البرد و التلج ده تخيل بقى و ايه و علشان الطين تزيد بلة كانوا بيكنسوا طريق سريع ....
برضوا مش دى الحاجة العجيبة لكن الموقف بقى اللى شدنى بجد الولد اللى كان بيكنس الشارع و عامل المكنسة كأنها فرشاة ألوان و الارض كأنها لوحة و بيكنس كأنه بيرسم و سعيد جداً و هو بيعمل كده ...

الرضا , ممكن تكون شغال فى مكتب و عندك ساعى و موظفين كتير تحت ايدك لكن انت مش راضى جواك حاجة عايزة تتحرر من تلك المسئولية الدائمة اللى حتى بتلازمك و انت مروح البيت و قاعد و نايم فى السرير كمان ....لكن الولد اللى كان بيكنس الشارع ده انبسط فى شغله و روح البيت و باله رايق لان مسئوليته فى الشغل مؤقتة ينام بقى براحته خلاص مفيش حد هيفتش ورا فى شغل اتعمل حتى و لو امبارح ....

صدقنى ربنا عادل جداً ممكن يكون فى واحد انت بتحسده على منصبه بس هو من جوه نفسه يصرخ و يكون بيحسدك على اللى انت فيه , عارف ربنا حاطط كل واحد فى المكان الصح و لذلك افتكرت الاية دى مش عارف ليه سبحان الله :
" وَرَفَعْنَا بَعْضَهُمْ فَوْقَ بَعْضٍ دَرَجَاتٍ لِيَتَّخِذَ بَعْضُهُمْ بَعْضاً سُخْرِيّاً وَرَحْمَةُ رَبِّكَ خَيْرٌ مِمَّا يَجْمَعُونَ "

كأن ربنا عايز يقولك مش معنى انه تحتك يبقى انا مش رحيم به , لا ابداً ده ربنا رحيم به و رحمة ربنا به أفضل من اللى انت عامل تجمع فيه ., و حاجة كمان برضوا ربنا عايز يلفت نظرنا ليها , مش معنى انه هو مسخر ليك انك مش ترحمه خليك فاكر رحمة ربنا افضل من اللى انت بتعذبه علشان اللى عايز تجمعه و زى ما انت بترحمه ربنا هيرحمك و لو مرحمتهوش النبى صل الله عليه وسلم قال :
من لا يرحم لا يرحم .

حقيقى رحمة ربنا خير مما يجمعون فعلاً , اللى بيجمع مال تعبان فى جمعه و الناس بتفكره سعيد به , أبداً ده هو شقيان فى جمعه و ايه بقى بيتعب فى صرفه لانه بيصعب عليه كل قرش بيتصرف امال انت فاكر انهم قالوا فى الامثال : " متهونش الا على الغلبان "ليه يعنى .؟؟!!!
علشان كده رحمة ربنا خير مما يجمعون فعلاً ...

التعليقات