الأكثر مشاهدة

أخر المقالات

انا هتجوز و محتاسه

الكاتب : doaaammar doaa

ده دليل للبنت اللى قربت تتجوز فيه معلومات تهمك فى تجهيز شقة الزوجيه .
بصى انا مش دارسه ديكور او تنظيم و ترتيب للشقق بس انا واحده عاديه جدا جه عليا الدور انى ارتب شقتى و اوضب عش الزوجيه و مريت بكل مراحل ترتيب الشقه و شراء الحاجات اللازمه فى تجهيز شقه العمر انا هقولك تجربتى و هقولك ع حاجات انا بحثت عنها فى النت و دورت و سالت و لفيت و دورت لحد ما جهزت حاجتى كلها انا و خطيبى و الحمد لله متجوزه بقالى 5 شهور اهو فانا هسهل عليكى الدنيا و اقولك تعملى ايه و توفرى من ايه لايه و تجيبى حاجاتك ازاى و ايه الحاجات المهمه و الحاجات اللى مش مهم تجبيها و ايه الحاجات اللى لو وفرتى فلوسها ممكن تجيبى بيها حاجات افيد ليكى و هكذا من كل ما نمر به من ظروف فى تحضير الشقه .
انتى دلوقتى فى اواخر مرحلة الخطوبة يعنى يعتبر خلصتى من مرحلة مهمه فى حياتك و عديتى فيها بحلوها و مرها و دلوقتى انتى قربتى تتجوزى و وراكى الف حاجه عايزة تخلص و تشتريها عشان تكملى جهازك و تجهزى شقتك زى مانتى عايزة و ع مزاجك .
طبعا تأسيس بيت جديد مش حاجه سهله و محتاجه تفكير كبير عشان لما تيجى تشترى حاجات تختارى الافضل من حيث السعر و الجوده و الراحه و الالوان المناسبه للديكور و اساس الديكور سواء مودرن او كلاسيك الخ الخ من كل الامور دى .
هناخدها خطوه خطوه هنبتدى بالاساسيات اللى هترتبى عليها كل ما سبق ..
أولا اساسيات تحضير الشقه
علشان توضبى شقة العمر محتاجه منك تفكير طويل لان دى الشقه اللى هتبتدى فيها حياه جديده و اللى ع اساسها هتعيشى مرتاحه فانتى بتفكرى وانتى بتوضبى الشقه لقدام لشوية سنين جايه مش عايزة تتعبى نفسك فى شراء حاجات تانيه والا توضيب تانى انا هديكى اساسيات تشتغلى عليها و على الاساس ده ممكن تبتدى ترتبى افكاراك و توضبى شقتك زى مانتى عايزة و من غير ما تتعبى نفسك فى لف و دوران و سؤال البنت دى و البنت دى و دى تحيرك و دى تسوحك خليكى معتمده ع نفسك فى المضووع ده .
انا هبدأ معاكى باساسيات الشقه اللى هو هنبتدى من اول فرشة معجون هتتحط فى الحيطه لاخر لمسه فى الشقه قبل ما تقفليها عشان تروحيها اول يوم بعد الزفاف ان شاء الله
اول حاجه هنتكلم فيها من اساسيات و هيا اللى بتحددى عليها كل حاجه بعد كده هيا الوان الشقه .
• الوان الحوائط و الارضيات و السيراميك للحمامات و المطبخ
ودى لازم تختاريها بدقه لازم الالوان تبقى مريحه للعين عشان لما تدخلى شقتك تحسى براحه نفسيه فى المكان ما تحسيش ان الالوان مزعجه لعينك او بتأثر عليكى تأثير سلبى لان الالوان كائن حى بيأثر على طاقتك و نفسيتك عامة هوضحلك كل حاجه واحده واحده بس اللى عايزة اوضحه فى موضوع الالوان انك محتاجه الوان تقعد معاكى اطول فتره بدون ما تبطل موضتها او تحتاجى تغيريها بعد فتره قليله و على اساس الالوان هتحددى العفش و الديكور و الاكسسوارات و الخ الخ ...
اتعرفى ع معانى الالوان و اختارى منها اللى يناسب شخصيتك لتزيين شقتك .
اللون الاسود : يرتبط اللون الأسود بعنصر الماء أيضاً وهو يرمز إلى المال والدخل. وهو لون الفخامه وعند دمجه بالمعدن يصبح هايل للديكور والأسود لون السلطه ممكن تشتخدميه كبديل اللون البنى فى الاخشاب او كديكور فى الشقه بس متزودوش من اللون لانه بيدعى للكأبه و الحزن .
اللون الابيض : لون النقاء و الصفاء لون الطبيعة ورمزا للراحة والهدوء الأبيض ينقي الجسم من السموم ويخفف من التوتر يرتبط اللون الأبيض بعنصر المعدن. ويرمز هذا العنصر إلى الوضوح والدقة والثقة ويمنح الشعور بالمرح والتفاؤل. ويعمل الأبيض بشكل أفضل عند دمجه مع اللون الذهبي أو الفضي و من الالوان المفضله فى دهن حوائط الشقه بالكامل لانه بيدى وسع كبير جدا لو المساحه صغيره بتببان اكبر و بيديكى راحه للعين و شعور بالهدوء و ده الاختيار الانسب للرسيبشن و طرقات الشقه .
اللون الفضي: لون الثقة والرومانسية ممكن دمجه كديكور فى حجرة النوم او الرسيبشن هتلاقى ديكورات كتير واخده اللون الفضى.
اللون الاحمر : هو يرمز إلى العاطفة والحب والحماس هو لون بيزود من طاقتك، و بيقوى الجانب العاطفي عندك عشان كده هو لون الحب ممكن تستخدميه فى دهن حيطه من حوائط غرفة نومك او ممكن تستخدمى هذا اللون في الفرش والأكسسوارات.
اللون الازرق : هو لون بيرمز لعنصر الماء و لون السماء والبحر هو لون التأمل والهدوء والمغامرة اللون ده بيساعد في تخفيف الشعور بالتوتر ويخلق شعوراً من السلام و الهدوء والثقة ممكن تختاريه فى الرسيبشن كاختيار بيديكى احساس بالهدوء و الراحه النفسيه .
اللون الاصفر : يرتبط اللون الصفر بعنصر الأرض وهو يرمز إلى التفاؤل و رفع المعنويات. والأصفر يمثّل أشعة الشمس وبالتالي فهو يمنح الإحساس بالحياة والطاقة والدفء والبهجة و بيديكى الشعور بالطاقه و الابداع و بيخليكى مركزه و يفضل استخدامه اللون ده فى حيطه واحده و ده من ضمن اللى ممكن تستخدميه فى الرسيبشن بس ده لون حساس لو استخدمتيه لازم تظبطى اكسسواراته و ديكوراته بشكل معين عشان يديكى فى الاخر الشكل الحلو اللى انتى عايزاه و ممكن تستخدميه كديكور فى اوض الاطفال او كديكور للمطبخ فى السيراميك بقى او فى الاكسسوارات اللى هتعلقيها فى مطبخك لانه لون بيديكى حيويه و نشاط اللى انتى محتاجاهم وانتى داخله المطبخ .
اللون الأخضر : يرتبط اللون الأخضر بعنصر الزرع و الارض و ممكن تربطيه بعنصر الخشب، و ممكن تستخدمى اللون ده لتعزيز الشعور بالمغامرة والتغيير. وهو يرمز أيضاً إلى الغنى المادي والشفاء والصحة والتوازن بيديكى راحه نفسيه و توازن فى حياتك ده ممكن تستخدميه فى الرسيبشن او فى اوض الاطفال .
اللون الاورانج البرتقالى : يجمع اللون البرتقالي بين اللون الأصفر و الاحمر اللون ده من الالوان اللى بتساعدك على التنظيم والتركيز هو مقارب فى وصفه للون الاصفر فهو لون مبهج جدا و بيرفع المعنويات و بيخليكى واثقه من نفسك ده من الالوان اللى ممكن تستخدميها فى دهن حائط فى الرسيبشن او تستخدميه فى سيراميك المطبخ او ديكوراته لانه بيديكى حيويه للشغل و ثقه فى نفسك.
اللون الأرجواني البنفسجى: هو لون يعزّز الوعي الروحي و تحقيق التوازن العقلى و هو لون ممتاز للشفاء الجسدي والعقلي. والأرجواني هو لون ملكي مناسب فى دهن حائط رئيسى فى الرسيبشن او دهنه فى لون حجرة الاطفال او فى حجرة النوم .
اللون البينك او الوردى : هو لون الحب بيديكى احساس بالهدوء و الصحه و هو لون انثوى شوى عشان كده تلاقىه اختيار فى اوضة اطفال للبنات او لون لبنوتات الصغيره عشان هو لون البراءة و يعطى شعور بالدفء و تخفيف المشاعر العدوانيه ممكن تستخدميه فى حجرة الاطفال زى ما قولتلك مع ديكورات الوان هيبقى حلو اوى .
اللون البني: يرتبط اللون البني بعنصر الأرض وهو يرمز إلى الإستقرار كما يمنح هذا اللون الشعور بالأمان والطمأنينة ويعزز الروابط الأسرية ممكن تستخدمى لونه فى الاثاث الخشبى او تستخدميه كالون باركيه للارضيات و انتى كمان ممكن تستخدمى منه درجات البيجات او الكافيه الفاتح من الالوان الجميله اللى ممكن تستخدميها فى دهن الشقه كلها مع الاحتفاظ بللون حائط الاساسى اللى قولنا عليه اللى هو هيبقى لون قوى ده ممكن تستخدمى معاه الاورانج او الاخضر او الاحمر او الاصفر فى الرسيبشن و ممكن تدهنى بيه اوضة النوم و تخلى لون الحيطه الاساسى لون من الالوان اللى سبق ذكرها اللى بتليق معاه .
اللون اللافندر الموف الفاتح: يجمع هذا اللون بين الأزرق والأرجواني، وهو يدعو للهدوء والتأمل والطمأنينة. كما أن إستخدام هذا اللون يخفف من فرط الحركة ويدعو إلى تهدئة المشاعر بين الأفراد من الالوان اللى ممكن تستخدميها فى اوض الاطفال او تستخدميها فى سيراميك الحمام .
انا دلوقتى عرضتلك جزء من الالوان و معناه و ده ممكن يساعدك ع اختيار لون مناسب لكل مكان فى الشقه نيجى بقى للخطوة اللى بعد كده .
أزاى تختارى اللون و تبدئي فى العمل
طبعا بعد المشاوره مع خطيبك عشان ما يحسش انك عايزة تعملى الشقه ع مزاجك و يحس انه مالهوش لازمه فى الموضوع هو هيعيش معاكى فى المكان ده و لازم ع الاقل يختار مكان ع زوقه يبقى هو اللى مختاره عشان يبقى مرتحله نفسيا هو الموضوع هيبقى موضوع نقاشى عادى مافيهوش شد والا جذب عشان توصلوا لانسب اختيار ليكم انتوا الاتنين و مناسب لازواقكم مع بعض و ممكن لو زوقه معجبكيش او العكس تحاولو تقنعو بعض بوجهة نظركم عشان توصلى لانسب حل يرضى الطرفين .
بس ملحوظه صغيره : انا قولت فى بداية خطيبك يعنى مقولتش مامتك حماتك اخت خطيبك والا جارة خالة ستك مختصر كلامى ما تحاوليش تاخدى اراء ناس كتير فى اختيار اللون لان ممكن اللى يعجبك ما يعجبش حد تانى او تالت فالبتالى هتحتارى و مش هتعرفى تستقرى ع لون عايزة نصيحتى لو اختارتى اللون اعملى بحث بسيط عالنت ع جوجل صور يعنى و شوفى الناس اللى عامله اللون ده فى الحوائط او الديكور منظماه ازاى لو عجبك اعمليه علطول و متحاوليش تشغلى نفسك باراء اللى حواليكى زى ما قولتلك عشان ما يحبطوكيش و تلاقى نفسك تايهه انتى و خطيبك اللى هتعيشوا فى المكان ده فالبتالى اعمليه ع زوقك انتى و هو مش ع زوق حد تانى .
انا عملت كده بصراحه انا اللى اخترت الالوان و عرضتها ع خطيبى و عجبته فى ناس من اللى حواليا عجبهم و ناس معجبهمش بس عملت اللى ريحنى فى الاخر و بعد ما خلصت الشقه مش عايزة اقولكم عاجبهم ازاى الشكل العام
يعنى من الاخر ما تسمعيش لحد و سيبك من كلام الناس اللى لا بيودى والا بيجيب .
لما تيجى تختارى اللون حطى فى دماغك شوية اساسيات بسيطه هعرضها عليكى دلوقتى :-
القواعد الاساسيه فى اختيار الالوان :-
بصى اختارى لون الارضيات يليق ع لون الحيطه يعنى لو هتعملى الحوائط دراجات البيجات اختارى الارضيات بنفس الالوان او درجات فاتحه من الالوان عشان تديكى مساحه واسعه و تظبط معاكى الديكور اوعى تختارى الوان غامقه فى السيراميك والارضيات عن تجربه هتتعبك فى التنضيف و لو عليها سنة تراب قد كده بتبان بسرعه عليها و دايما تحسيها مش نضيفه غير ان الالوان الغامقه بتصغر المساحات او بتضيق المكان و العكس مع الالوان الفاتحه اللى بتدى وسع للمكان و ما بيبانش فيها التراب بسرعه او تتوسخ بسرعه و يفضل يكون فيها نقشه بسيطه زى الخطوط او رسمة الرخام لان الساده بيبان عليه التراب و بيبان انه مش نضيف ع طول غير ان اى حاجه بتأثر فيه اللى ليه نقشة خفيفه احسن بكتير و الباركيه كمان اختيار حلو اوى و بيغنيكى عن انك تتحددى بالوان الحيطه او ان يليق ع الوان الشقه هو بيبقى واخد لون الخشب و بيليق ع كل الدهانات و البورسلين كمان جميل جدا بس مشكلتهم انهم غاليين حبتين ده حسب تقديرك و حسب مقدرتك كل واحده هتظبط شقتها ع قد تكلفتها .
و حاولى تختارى الوان هاديه و فاتحه تدهنى بيها الحوائط كلها عشان تدى مساحه للشقه و تدى وسع كبير و تدي راحه نفسيه للمكان و راحه للعين زى اللون ( الابيض – الكافيه )
الوان الرسيبشن او الصاله او غرف المعيشه
فى الرسيبشن يفضل تخليكى فى الالوان الهاديه عامة و الطرقه بتاعة الشقه تاخد نفس اللون يعنى لو الرسيبشن او الصاله خدوا لون يبقى الطرقه تاخد نفس اللون ده و تختارى حيطه واحد رئيسية فى الرسيبشن تعملى فيها لون مختلف زى ما تحبى اللون ده بس يفضل يكون لون صريح و قوى و لازم طبعا اللون الهادى يكون لايق على اللون الصريح اللى هتختاريه فى الحيطه دى مثلا لو هتختارى ( كافيه فاتح ) للحوائط كلها اختارى لون ( الاورانج – الاحمر – ألاصفر الكنارى – الاخضر ) لو انتى هتختارى ( أبيض ) و الابيض من الالوان اللى بتليق ع حاجات كتير و بيدى وسع للشقه كبير اوى و بيدى راحه نفسيه للعين هو من أحسن الاختيارات فى الوان حوائط الشقه ممكن تختارى معاه لون قوى زى ( ازرق – اخضر – احمر – موف – فوشيا ) زى ما تحبى من الالوان بس يفضل ما يبقاش فى الحيطه الاساسيه نقشات خليها ساده عشان تعرفى تلعبى فى الديكورات براحتك لان ع اساس الحيطة الاساسيه اللى باللون القوى ده هتختارى الديكورات بتاعة الشقه من براويز و فازات و ستاير و انتريه او صالون الى اخره من اكسسوارات هبقى احددها لوحدها
و ممكن تعملى بدل الحيطه اللى باللون القوى اللى قولتلك عنها الحيطه الرئيسيه ممكن تعمليها ورق حائط تكون فيه نقشه بسيطه و الوانه لايقه ع باقى الوان الشقه مش هتبقى تكلفه كبيره لو عملتى حيطه واحده بس ورق حائط و باقى الشقه اللون الاساسى بس هتفرق معاكى فى الديكور و الشكل العام هيبقى أحلى فعندك ورق الحائط من الاختيارات المناسبه لو حبيتى تعملى شقتك بشكل مختلف و طبعا هتختاريه ع اساس هتعملى شقتك كلاسيك والا مودرن و الالوان تبقى منسجمه مع بعضها و لايقه ع ديكوراتك و الوان الحوائط اللى انتى عملاها .
الوان اوضة النوم
أوضة النوم اوضة اساسيه فى الشقه و انتى بتعملى الوانها خلى فى بالك ان دى الالوان اللى هتشوفيها كل يوم قبل ما تغمضى عينك و هيا اللى عينك هتفتح عليها الصبح يعنى لازم تنقيها الوان هاديه و بتديكى صفاء لذهنك و هدوء و راحه نفسيه حاولى تختاريها فى الفواتح الابيض او البيج و لو حابه تعملى لون صريح و قوى اعملي حيطه واحده زى ما قولتلك قبل كده تظبطى ع اساسها الديكور و انتى و زوقك فى الموضوع مكن تعملى جانب ورق حائط فيها بس حاولى تخليها زى ما قولتلك الوان هاديه بتديكى روح حلوة لما تيجى تشوفيها وانتى رايحه تنامى او تصحى عليها خليها الوان تساعدك ع الاسترخاء .
الوان اوضة الاطفال
دى بقى اوضة الشقاوة و اللعب و الاطفال اللى كلهم حيوية و برائه و حريه و شقاوة و عايزين يعملوا حاجات كتير فى الفتره دى هو طبعا انتى بتختارى الالوان ع اساس انها تبقى اوضة فانى كده كل اللى يدخلها يبقى عايز يقعد يلعب فيها فنصيحه ممكن تدخلى اكتر من لون فى الاوضه دى بالذات و تخليها بديكوراتها و العابها مجذبه العبى فيها بالالوان براحتك انشاله تعملى حيطه صفرا و حيطه خضرا و حيطه زرقاء هيا محتاجه اللى يدخلها يحس فيها بنشاط و حيويه هو انتى و راحتك عايزة بعد كده طفلك يكون هادى بتدهنيها بالوان هاديه عايزاه شقى بتديله الوان فيها حيويه و نشاط بس حاولى تبعدى عن الالوان اللى ممكن تزود فرط الحركه لانها هتأثر ع اطفالك هتلاقيهم عصبيين و عنيفين فى اوقات عامة دى اوضه مالهاش قواعد العبى فيها زى مانتى عايزة هيا عامة بتبقى اوضه هامشيه لحد ما تجيبى طفل و يقعد لحد ما يبقى عنده سنيتن تلاته لحد ما ينام فيها لوحده فخلى فى بالك انك تعمليها ع الاساس ده انها مش هتحتاجيها دلوقتى انتى اصلا ممكن تستخدميها كحجرة معيشه صغيره او حجره ابداعيه ترسمى و تلونى فيها لحد ما حد يعيش فيها و ساعات بتبقى غرفة للضيوف هيا مالهاش قواعد فى دهان حوائطها بس حاولى تخليه واخد طابع شقى شويه .وانتى و زوقك فى الاخر .
الوان المطبخ
زى ما قولت قبل كده ان المطبخ محتاج لون زى الاصفر او الاورانج عشان يديكى حيوية و نشاط لما تدخلى فيه .. محتاجه لما تدخليه تحسى انك نشيطه و نفسك مفتوحه انك تعملى حاجات و تبتكرى حاجات .
طبعا لون المطبخ الاساسى بيبقى بنى اللى هو لو هتعملى مطبخ خشب لكن لو هتعمليه الوميتال فانتى ممكن تلعبى بالوان كتير فى المطبخ يعنى ممكن تعمليه اى لون انتى عايزاه فى حال انك عملتى المطبخ لون خليه يليق مع الوان السيراميك و الارضيات يعنى لو هتعملى السيراميك بدرجات الاورانج الفاتح كمثال ممكن تعملى المطبخ الالوميتال اورانج صريح او تعمليه بنى و تلعبى بديكورات المطبخ بس نصيحه خلى السيراميك او حوائط المطبخ بلون فاتح عشان ما تحسيش بضيق المكان و هو فالاصل بيبقى ضيق مش واسع فى اغلب الاوقات المطبخ و الحمام بيبقى حجمهم صغير فخلي الحوائط فاتحه و العبى بديكورات المطبخ اللى هتتحط عالرخامه و اللى هتتعلق عالحيطه و لمبة المطبخ و الخ من جميع اكسسوارات المطبخ اللى ما بتتعدش .
الوان الحمام
خليكى فى الالوان الهاديه اللى تديكى انسجام و راحه عشان وانتى بتاخدى شاور فى استجمام كده اختارى درجات فاتحه فى السيراميك وانتى و زوقك فيه .
و هكذا طبقى الالوان زى مانتى عايزة فى شقتك مع مراعاة ان الالوان دى هتخليكى تحددى عليها باقى الشقه هيا اساس البيت خلصتى من اساس البيت ابتدى بقى خططى للخطوه اللى بعدها الا و هيا شراء الاوض الخشب ( اوضة النوم – السفره – الانتريه او الصالون – اوضة الاطفال – المطبخ الخشب ) و اكسسوارات و ستاير و سجاد و الخ الخ الخ الموضوع كبير يعنى مش اى كلام و هبتدى اشرحلك بردك بالتفصيل هتعملى ايه فى كل ده خطوه خطوه .

التعليقات