الأكثر مشاهدة

أخر المقالات

حظ ولا تعب ؟!

الكاتب : جمال النشار

حظ ولا تعب..
السؤال الأبدي الفلسفي الذي لن تستطيع ان تجيب عليه بقلب سليم مائة في المائة ..دوما هناك ما يجعلك تتردد قبل الإجابة ...يعني مثلا...الواد الكيوت بتاع الچي يو سي..ابو عربية باسات اللي بتشوفه في الزمالك ببنطلون محزق ودقن المحارب التركي وحالق الجناب زيرو ومعاه بنوتة بشعر بلوند كيرلي ولابسة من النيو كولكشن بتاعة اتش اند ام ..لو سألتك تفتكر الواد ده هايشتغل فين وازاي؟؟ هتلاقي نفسك فجأة بقيت عراف قارئ مستقبل :
- مممم.. يا في مجلس ادارة شركة..يا ماركتينج في شركة...يا صاحب بيزنس ..يا.... الخ...
طيب يبقي " حظ أمه " كدة ! متعبش في مصدر ماله...معداش علي رحلة تلطيم في مواصلات ومصالح حكومية ومناطق عشوائية ..- بس ببشوفهم في الافلام ياعيني مفشوخين أوي - مطلعش تلاتة عين أهله في دراسة وشغلانات اي كلام يتمحك فيها في مديرين منفسنين علشان يترقي بعد عشر سنين وياخد مرتب حلو اللي هو يادوب مصرف "بيري"..آه دي البنت بتاعة الزمالك :)....آه آه طبعا دي ارزاق وربنا اللي بيقسمها ...أيوه يعني "حظه" من الرزق كبير :D ولا تعب وراح اتمرمط في بلد الجنيه غلب الكارنيه طيب ماتيجي كدة نشوف الشاب العادي اللي هو بيبقي غالبا " محمد \ أحمد جمال ...ابن بدوي وبيومي وعباس ومصطفي....تجارة\آداب\حقوق.. عين شمس\القاهرة\ اقاليم..اللي بشوفه مرمي في وسط البلد او علي القهوة بتفرج علي كورة بس وبيسمع حماقي وتامر عاشور واحيانا لو بيفهم منير ودينا الوديدي وهو بياكل دماغ سمر انتكة او رنا السافلة علي "الواطس"..ده حظه حلو ولا تعب وشقي ؟؟ الأولاني بيطلع في صور " كايرو زووم"...والتاني بياخد اسكرين شوت يعمله كوفر لنفسه لما يلاقي نفسه أول كومنت علي صورة في صفحة "أساحبي" ! الأولاني السوشيال ميديا عنده للمنظره..والتاني اسلوب حياه ..الأولاني دايما هو اللي بيعمل ايموشن زعلان لخبر موت التاني...الأولاني بالنسبة له آخر اربع سنين في مصر " عدم استقرار وحاجة سيس"...والتاني دايما هو اللي لسة بيقول " انا عملت ثورة"...الأولاني مش مثال لكل الاغنيا...والتاني دايما هو احسن الفقرا...الاولاني يتريق علي الناس اللي أقل منه حتي لو رجع عمل متحضر وقال سوري دول بني آدمين بردو ...التاني دايما يصعب عليه اللي اقل منه..في دولة الصومال الشقيقة !! التاني ده اللي بيتمحك في الزمالك والمهندسين ..علي سبيل "الخروجة"...وبيسمع عن حفلات الساحل علي اساس انها حفلات اورچي ! الأولاني مبيهموش زيادة الأسعار ببصله..بس بيقول أوف وخلاص...التاني بييجي يكتب كلمتين عن الفرق بين الحظ والتعب..واول حاجة بتتقال له " يخرب بيت النفسيات الجحيم !!" مع ان المناضلين ضد الفقر في كل مصيبة في الدنيا بدافعو عن حق اسمه العداله ...اللي هيا جاية من العدل...اللي هو المنهج الامثل ..وصفة من صفات الاله....بس بردو تلاقي الكومنت الفقيع عن الحقد..أو محاولات ساخرة - فقيعة بردو - انه يعلّي علي الكاتب بابفيه يجيب دوالي رغم انه ضمنيا عارف ان الفرق بين ولاد البلد دي ملايين السنين الضوئية ...بس دايما جواه ثقافة ان عيب ابص للي عند غيري حتي لو هموت من الجوع ومظلوم ومقهور ومسروق وضحية نهب منظم ! دول بيليق عليهم دور الضحية وبيحبو يأدوه باحتراف ..

التعليقات