الأكثر مشاهدة

أخر المقالات

براويز


( 1 )
جوه عيونك .. صورة امي
وصورة اول بنت مسكت ايديها
صوت الخطوه مش بيعلم في الاسفلت
ولا شباك الضي عاد يستقبل طل عيوني
اخدوني ..
عيونك للبرواز
سميت ودخلتك غصبن عني
واستدعيت كل الصور المركونه في الذاكره ..

عااااهره ..
ايتها المصابيح
الحانات ترتشف ماتبقي
من قدسية المشهد
الا تضيئي هذه الاركان المختبئه
في الصورة الثانيه .؟

( 2 )
خارجه من الصوره
وبتسألي اخر عيل كان معدي .. الليل بيجي منين . ؟
والنهار مغمض عينه ليه في وش الواد .؟

ومراكب بتشدك يم البحر الساكن في الحواديت
وشطوط بتحن لاخر مشهد للغروب
وعيال بتجر اليوم ..

من رباط العنق الرمادي
هاهي .. تدق التاسعه
ويضاء الركن المنفصل عني
اشعر وكأني ..
اختنق
افض رباط عنقه الرمادي
فأستريح .

يااااااه
مش فاكر شفتك امتي ..؟
قبل مأولع اخر سيجاره كانت معايا
والا بعد الصبح
مالم رصيف الشارع ..
ومشي ..؟؟

( 3 )
قمر .. باعت ضيه
يحلب الكفين
صفين .. عسس
علي بوابات حلمك القديم
لاقادر تنطلق وتحضن خيوط شمسك
قبل الغروب
ولا قادر علي التوب ..
الجديد .
( 4 )
يزعق الوابور
الواقف من 30 سنه
تصفر جواك الريح
ويتهز النخل الساكن .. كل ضلوعك
فتتمدد في عروقك
تراتيل الحلم ..
المنسي .
( 5 )
وتاخدك من روحي
وتطير وياها
تفضل طاير طاير طاير
لحد عنيك ماتلمس ضلك ..
فتقع .!
( 6 )
بالظبط ..
كأنه مات
نام علي الارض .. وغطي نفسه بالجورنال
مافتكرش يبتسم
غير لما قام ..
ياخد عزاك .!
( 7 )
صورتك المرسومه
في سقف الاوضه
ماعرفش ليه .. دخان سيجارتي
مابيطولهاش . !!

القاهره 1995
من ديوان ( علي قهوه في روض الفرج

التعليقات