الأكثر مشاهدة

أخر المقالات

كتاكيت الفراندا - مسرحية


مسرحية

كتاكيت الفراندا


عن
أشعار فؤاد حداد



إعداد
أحمد عادل القُضَّابِّي


مونولوج الافتتاح

نوح : إيه ده ؟! إحنا في أيها ساعة دلوقت؟ إحنا بالنهار ولا بالليل؟ لا شمس باينه، ولا قمر.. وإيه الحلم اللي فيه ناس كتيرة ده يا إخواتي!! أنت يا سي الأفندي.. أنت يا أستاذ.. إنت يا مدموازيل.. هما ما بيردوش ليه؟!.. آآآآه.. علشان إحنا في الحلم.. طب هما سايبين بيوتهم ليه؟!.. أنتو سايبين بيوتكم ليه؟ مش خايفين من الإنجليز؟!.. صحيح المظاهرة بتاعت إمبارح مات فيها ناس كتيرة.. بس أكيد سعد باشا لما يرجع بالسلامة هيخرج الإنجليز من البلد...........
نفسي أعيش لليوم اللي أشوف فيه مصر حرة مستقلة.. سعد.. سعد.. يحيا سعد.. عاشت مصر حرة مستقلة.. اللااااااااااااااااااه.. والله أنا أنفع هتيف علي كيفك.. المظاهرة بتاعت بكرة لازم أهتف فيها. بس؛ يا تري إيه هيكون حال البلد بعد ما نخرج الإنجليز منها؟!.. أكيد هنعلم ولادنا أحسن علام، وهناكل أحسن أكل.. وهنلبس أنضف هدمة.. والعيشة هتكون هنية.. والواحد منا هيمشي رافع راسه، ومافيش عسكري يقدر يقوله: فين بطاقتك؟ أو تلت التلاتة كام. إحنا تعبنا قوي من الاحتلال.. إيشي أتراك علي مماليك علي فرنسويين علي إنجليز.. نفسي أشوف البلد دي بيحكمها واحد مصري.. ابن مصري.. أيوة.. ويحب ناسه ذي ما سعد باشا ما بيحبنا كده، ونحبه ذي ما بنحب سعد باشا.. يااااااااااااااااه.. دي هتبقي عيشة فُلّلي. بس هو الحلم ممكن أحلم فيه؟.. لأه؛ ده أنا شكلي استهويت، ولازم أتغطي كويس. [ يغطي نفسه وينام ]

[ صوت أذان ديك يعقبه ظهور الكورس الأربعة بأقنعة الكتاكيت ]
الكورس: صو صو.. صو صو.
الكورس: إحنا كتاكيت الفراندا.
ك2: كتاكيت شقية..
ك1: ومسلية.
ك3: كتاكيت بتفهم في التاريخ..
ك4: وكمان عاطفية .
ك1 : وبنغني في صوت واحد ..
الكورس : صو صو .. صو صو ..
ك1 : أنا سؤسؤ
ك3 : وأنا سأسأ
ك4 : وأنا سئسئ
ك2 : وأنا صوّ
الكورس : إحنا كتاكيت الفراندا ، ومش خايفين نتوه .
ك1 : أنا سؤسؤ سمباتييك
ك3 : وأنا سأسأ في البوتيك
ك4 : وأنا سئسئ أسأليك
ك2 : إنتي حلوة والا وحشة والا لأ ؟
ك1 : أنا سؤسؤ حاشي ضرسي بالرصاص
ك3 : أنا سأسأ حاشيته بالدهب
ك4 : وأنا سئسئ مش حاشيه
ك2 : وأنت حلوة والا وحشة والا .......
ك1 : إنتي وحشة بتوحشية
ك2 : أنا صوّ المستوي .. ع البخور المستكي .. وأنا الفصيح المستحي .. بعت نفسي بكام دولار..
الكورس : باع نفسه بكام دولار .. باع نفسه بكام دولار!!
ك2 : بس كان كل الدهب والفضة فالصو ..
الكورس : فالصو !!
ك2 : والرصاص كان برضو فالصو
الكورس : فالصو !!
ك2 : والحزن فالصو ، والحب فالصو ، كله فالصو
ك1 : طب والناس ؟
ك2 : فالصو .. فالصو ..
ك3 : أعقل يا صوّ ..
الكورس : إحنا كتاكيت الفراندا
ك4 : كتاكيت شقية
ك1 : مسلية ..
ك3 : تاريخية
ك4 : عاطفية
ك2 : حمصية .. سمسمسة .. مهلبة ..
ك1 : أنا سؤسؤ سمباتييك
ك3 : وأنا سأسأ في البوتيك
ك4 : وأنا سئسئ أسأليك
ك1 : وبنغني في صوت واحد ..
الكورس : صو صو .. صو صو .. طلعت أدب ، نزلت أدب .. وطالع نازل ، أقزقز لب .
ك3 : أردب
ك4 : أرادِب .
ك3 : أرنب
ك 4 : أرانِب .
ك1 : وكمثل الدُب ..
ك3 : كمثل الدِب ..
ك4 : يجُب في جُب ..
ك1 : يعبي في عِب ..
الكورس : صو صو .. صو صو .. طلعت أدب ، نزلت أدب .. وطالع نازل ، أقزقز لب .
ك2 : أنا أخوك الدِب ما انيش الديب ..
ك3 : ده منفنجل عينه ، تقول ده أديب ..
ك4 : والا دا عاشق داب في الدباديب ..
ك2 : طلعت أدب .. البط ما باضش
ك1 : نزلت أدب ..
ك2 : أخوك ما قبضش .
ك3 : ما تستعبطش !!
ك2 : دا أنا باتلخبط
ك3 : ما تتلخبطش
ك1 : وطالع نازل ، أقزقز لب .
ك4 : العالم ماله ؟
ك3 : العالم وج .
ك2 : أكلت حبيبك ؟
ك3 : كلته يا حج .
الكورس : صو صو .. صو صو .. طلعت أدب ، نزلت أدب .. وطالع نازل ، أقزقز لب .. صو صو .. صو صو .. إحنا كتاكيت الفراندا ، ومش خايفين نتوه .
ك1 : أنا سؤسؤ سمباتييك
ك3 : وأنا سأسأ في البوتيك
ك4 : وأنا سئسئ أسأليك
ك2 : وأنا صوّ
الكورس : صو صو .. صو صو ..

تأسيس الميدان

ك1 : الزمان ..
ك3 : يمكن يكون الآن
ك4 : ويمكن يكون من شوية
ك2 : ويمكن يكون من الشوية اللي جايين .
ك1 : المكان ..
ك3 : هنا .. مش هناك
ك4 : ميدان
ك1 : أو محطة
ك2 : فيه الأونطة
ك3 : وفيه اللي باعوا الميدان
ك4 : وفيه الخالة شكشوكة
ك2 : علي نصبة الشاي زي نار الشتا قيدة
ك1 : وتحت المندرة خابزة .
ك2 : خمسة آلاف خلطبيصة ، وست آلاف خبصة .
شخص : واحد شاي فرسكة يا شكشوكة .
ك3 : مشلتتة لي فطيرة من عسل سلسال .
ك2 : شكشوكة أخصائية في دار الحكمة والأمثال .
شكشوكة : ضربني وبكي ، وسبقني واشتكى .
ك1 : أستاذة في التأليف
ك3 : ليها ألف حكاية محبوكة
ك1 : بنية في غاية الظرف
ك3 : واللطف والملاغية .
ك4 : عاملة البكا ضحك
ك2 : أما الضحكة ، فمشبوكة . [صوت ضحكة رقيعة من شكشوكة]
شكشوكة : واللي يلعب الدح يا عنيا ، ما يقولشي ..............
ك3 : الرقابة يا شكشوكة .
شكشوكة : يوه !! فكرتني يا اسمك ايه .
ك1 : عازمة عليه تعشيه ..
ك2 : أو يعشيها . [ك3وشكشكوكة يتحركان خلف نصبة الشاي / الفرن]
م. الكورس : شكشوكة يا شكشوكة
كل الناس تدخل وتسك
إلا أنتي عاملة فاسوكة
ك4 : [يغني ممولاً] شكشوكه رؤية هلال الشك لما شكا ، ولما أشكل ، وجر شكل إلى أن بكى ................. .
ك2 : كفاية حرام .
ك1 : كوكو .. كوكو ..
الكورس : إحنا كتاكيت الفراندا ، ومش خايفين نتوه .
ك1 : أنا سؤسؤ سمباتييك
ك3 : وأنا سأسأ في البوتيك
ك4 : وأنا سئسئ أسأليك
ك2 : وأنا صوّ
الكورس : صو صو .. صو صو ..
ك1 : نبدي ونحكي الحكاية الشقية ..
ك3 : القصة العاطفية .
ك4 : شكشوكة في المهلبية .

ك3 : كان يا مكاني
ك2 : وأنا في مكاني
ك4 : يا سعد يا إكرام
ك1 : يا سيدة يا إمام
ك2 : يا فيصل يا هرم
ك3 : يا ولادنا يا حلوين
ك4 : يا بلدنا يا حلوه
ك1 : آدى من هنا حدوته
ك3 : وآدى من هنا غنوه
ك2 : وأدى اللي ديدى ديدى ديدى دي [ يدغدغ أحد زملائه ]
ك4 : ذي ما خف وطاب .. قلب الراجل أبو الخَطاب
ك1 : عايش لوحده هو ومرآته
ك3 : عدت عليهم شهور
ك4 : عدت عليهم سنين
ك2 : عدى عليهم قطر ... وبعدين
ك1 : صبحت كل ليلة تفوت .. تطلع شعره بيضا ف راسه [يضع إكسسوار أبو خَطاب، و4 يقوم بدور أم شكشوكة (شكش)]
ك3 : وشعره بيضا ف راسها .. [ 4 وهو الأم يقوم بتفلية راس الأب 1 ]
ك2 : قول بقرة بيضا
ك1 : [ الأب ] يارب .. أنا متهنى باللقمة اللي بشقي عليها طول النهار ، وبالولية الطيبة اللي بتعمل حساب لخاطر راجلها ، ولا شفت منها عمل ردى ، ولا سمعت منها كلمه ناقصة .
ك4 : [ الأم تنادى ] أنت يا مزغود .. يا مخفي .. يا ملهى على عينك بتعمل إيه ؟
ك1 : [ الأب ] يارب أنا عمري ف حياتي ما آذيت إنسان ، يارب .. خايف أموت .. ولا ابن يحمل أسمى من بعدى ، ولا بنت تترحم عليا .
ك3 : يتنهد أبو الخَطاب
ك4 : [ الأم يمصمص شفاهه ]
ك2 : تتصعب مراته
ك3 : والميه ف الأنايه تتصعب عليه
ك2 : والقطط فى بير السلم بتنونو
ك1 : [ الأب ] يارب ... انا بسألك عيل أوعيله .. يملا علينا البيت
ك3 : اضرب بفاسك في جذع الشجرة يا أبو الخَطاب
ك2 : وقول ع الوجيعه مرة
ك3 : ومره ع الطبطاب
ك2 : وارجع لبيتك
ك3 : هتسمع الزغاريد من أول الحارة
ك2 : [ يزغرد ] ....................... (مشهد الولادة) ...................................
[ 4 وهو الأم يتأخذ وضع سيدة تلد و2 يعمل دآية و3 يحضر الماء و ....... الخ ....... ]
شخص 1 : [ بحقد ] أبو الخَطاب ربنا استجاب لدعاه . [ شكشوكة تبكى كالأطفال ]
شخص 2 : [ بحقد أكبر ] اتولدت له بنت فلقة قمر [ شكشوكة تبكى كالأطفال مرة أخرى ]
ك3 : قبل ما تحبي شكشوكة كانت بتخطف عقول الرجال
ك2 : كفايه حلاوه يا بنت [ إلي شكشوكة ]
ك3 : والبنت يا خلاق تحلو يوم عن يوم
ك4 : [ الأم ] وتزيد أدب وكمال
ك2 : صبحت مزه
ك3 : بعود فاير وجوز ضفاير [ شكشوكة تقف على قدميها ]
ك4 : [ الأم ] مناخيرها نبقة
ك3 : وخدودها عليها الورد بيسلم
ك2 : مزه بتلاغى من غير ما تتكلم
ك4 : [ الأم ] وعيون تحسر الغزلان
ك1 : [ الأب ] وكل شبان البلد عينهم على شباكى خُطاب
ك3 : أم شكشوكة قالت ...
ك4 : [الأم ] بنتي ما يخفاش عجبها، ولا يرفع حاجبها، إلا الشاطر اللي يجيب لها هدية.. لا الجن قبل اليوم ولا الإنس جابها.
شخص : [ لشكشوكة ] لو يعرفوا اللي فيها..
ك2 : [ لشكشوكة ] مسنتيك في بير السلم يا قمر.
ك3 : يروحوا الخُطاب وييجو الخُطاب
ك2 : وأبو الخُطاب ... ما يعجبه ما لذ وطاب. [ أحدهم يقوم بدور خطيب ]
ك1 : [ الأب ] أنت فاكر إن فيلا ف مارينا تكفيّني!!
ك4 : [ الأم ] لأة ... قدر كويس يا نور عيني. [ 2 يقوم بدور خطيب ]
ك1 : [ الأب بقرف ] شهر عسل في تركيّا
ك4 : [الأم ] ليه هو أنا بنتي بايّرة
ك2 : خابت امال العرسان اللي على قد حالهم
ك3 : إلا تلاتة..
ك2 : إلا تلاتة؟؟
ك3 : تلاتة كانوا أصحاب ما يفترقوش [يقوم بدورهم 1 ، 2 ، 4 ، نراهم يلعبون "صَلَّحْ"]
ك1 : بليه صبي الميكانيكي.
ك2 : لية صبي الجزار.
ك4 : قدرة بياع البليلة.
ك1 : ناوينا السفر
ك2و4 : توكلنا على الله
ك3 : لو عرفت مين فيهم اللي هيفوز بالجوهرة المصونة والدرة المكنونة.. شكشوكة. أتصل بينا فوراً علي زيرو خمستاشر، أربع ستات، ستتين.. مع تحيات المفتش خريستوف.
[ينتبه الجميع إلي صوت الجنرال نوح]
نوح : [يغني] ما تزوقيني يا نينة قوام يا نينة.. شكشوكة هتجوزها بالسلامة يا نينة.
ك1 : [الأب] إحنا معندناش بنات للجواز يا ابني.
ك4 : [الأم] اسكت يا راجل.. ده الدهن في العتاقي.
نوح : بصي يا حماتي.. أنا لازم أكون صريح من البداية.. أنتو برضو ذي بابا وماما.. علشان اللي أوله سطر أخره كوبري.. ده أنا كنت خاطب قبل كده..
ك1 : [الأب] خاطب!! خاطب مين؟
نوح : كنت خاطب نفرتيتي، بس ظبطها خارجة مرة بالليل بعد العصر في الصوت والضوء، وهي لابسة استرتش مفتوح لحد هناااااااااا [يشير بيده إلي أعلى نقطة ممكنة].. ظبطها وهي رايحة تقابل تحتمس ابن عمها عند سفوح الأهرام.. ورحت مزعق بأعلى صوتي: حتى أنت يا تحتمس.
ك4 : [الأم] يا بني وأبو الهول ما صحيشي؟
نوح : كان رايح يجيب لهم اتنين آمون.. هه.. هه..[يسعل] يمسكوهم.
ك1 : [الأب] ما تخش في الموضوع علي طول يا ابني؟
ك4 : [الأم] وهاتقدم ايه لبنتي إن شاء الله؟
نوح : أنا هاقدم لها مسلة فرعوني وهرم صغير في مركب الشمس اللي قدام قصر عابدين.. و ....................... .
[يخرج الأب والأم ونوح يتابعهما وهو يكمل كلامه]
ك3 : والميدان بتاعنا مليان شخصيات..
ك2 : قدمنا منها شكشوكة، والجنرال نوح قدم نفسه بنفسه.
ك3 : ودلوقت هانقدم لكم باللغة والسيم..
ك2 : المزين الوسيم..
ك3 : نعيم كاللو.
ك2 : صاحب صالون النعيم.
[يظهر كاللو علي المسرح يُعد صالون الحلاقة، كما تعود شكشوكة لنصبة الشاي، ثم يعود باقي الكورس]
كاللو : [لأحد أفراد الكورس] أنت أقرع يالا .. ما ينفعش أحلق لك .
ك3 : كان المزيّن نعيم كاللو طبيب صُحّه ..
ك1 : اتربّى فى الرخص
ك4 : والاّ اتربّى فى الشُحّه
ك3 : على البلاطة شيطان ، م السقف مدّلدل
كاللو : تسمعوني نكتة ، أتحفكوا باتنين
ك2 : واحد .. اتنين .. تلاتة .. أربعة .. خمسة ..
كاللو : واللي يفضل علي حاله ، ما يبقاش مزين .
ك1 : يا عيني ع الأسطى كاللو
ك4 : يروح للبردان يعملوه كاسات هوا
ك3 : ويروح للغلبان يطاهر له العيال
ك2 : بس كان ندل بطبيعته ، ما كانِشْ غاوى يستندل
ك1 : وبسمته لمّا يسكت حبّتين ، تهبل
ك4 : لابس على سنجة عشرة ..
ك3 : ومَصْيَف صيفى ومصَهْلل
كاللو : المشط في ايدي زي الدوا .. والمقص في ايدي زي السلاح .. والغنا علي لساني .. طقتوقتانِ .. تَلاَت أرْبعْ خمسْ طقاطيق .
ك1 : مراية الأسطى كاللو ولا كل المرايا
ك4 : ومقصه أعمي من سيف عنتر
ك1 : أما صوته ...
ك3 : فبسمته أحلي .
ك4 : وفي صالون النعيم واقف يغني ومصهلل .
[ شخص يقوم بدور الزبون ]
ك1 : دَخَل عليه الزبون فى ساعة البِلْبِلْ
الزبون : وايه ساعة البِلْبِلْ دي ؟
ك4 : دى ساعة بين السَحَر والفجر
ك3 : تتبدّل فيها النبطشيّة
الزبون : نبطشية ايه، هو أنا داخل أحلق، ولا هشتري مخدرات؟
ك2 : خش لقضاك
ك4 : وهتلاقى النجوم طلّوا
ك2 : والشمس شايلة فانوس وبتغنّى
الكورس : حاللو يا حاللو .. حاللو يا حاللو ..
[الزبون يدخل صالون النعيم]
الزبون : احلق لى بشويش يا كاللو ده أنا مستعجل ..
كاللو : كده من غير سلام.. داخل عليا بالكلام
الزبون : ما علش.. أصلي مستعجل ..
كاللو : وعليكم السلام ...... [يشرع في البدء بعملية الحلاقة للزبون التي تستمر طيلة العرض].. بشويش يا كاللو عليه، لأَحْسَن ده مستعجل..
ك3 : ومن أهم شخصيات هذا الميدان
ك1 : الكاتب الصحفي
ك4 : والسناريست الأوزعي

ك3 : عوض الله أفندي
ك1 : وأفندي دي لقب قديم ، أطلقه عليه الأسطى كاللو .
ك4 : بس الشهادة لله .. هو ما ينفعش غير أفندي .
ك3 : الأفندي لا ف إيده منشه ..
ك1 : ولا على راسه طربوش
ك2 : ولا في جيبه ساعة بكتينه
ك3 : ولا شنبه .. شنب بريمه
ك4 : يعنى مش من مخلفات الماضي، والحمد لله
ك1 : لكن في الماضي بص وراه
ك2 : قام داخل الحقوق
ك3 : قام لاطش الليسانس
ك4 : قام بص قدامه
ك2 : الأفندي ما ينفعش قاضى
عوض : ما فيش مستقبل في المحاماه
ك1 : هاتروح عليه الحياة!!
ك3 : امآل ينفع إيه؟
عوض : تنفع إيه يا عوض الله؟ تنفع إيه يا عوض الله؟...... آه .. كاتب وصاحب رسالة، وامتلك مبدأ.
ك1 : لاء حدق
ك2 : لكن سلامة نيته أحدق
الكورس : فلنستعد .. فلنستعد .. فلنستعد .
عوض : يا صفحة بيضا بسرعة ... بسرعة أسودي .. ع المطبعة ودّى .. ع المطبعة ودّى .
ك3 : سِلّم .. فيه اللي يستلم
ك4 : وفيه اللي يفك الخط
ك2 : وفيه اللي بيصحح النحو
ك1 : وفيه اللي يُصف الحروف
ك3 : واللي يرسم لأجل توصل بنات أفكار عوض الله لإيد القارئ
ك4 : بس قبل ما يوصل بنات أفكاره كان واصل
ك2 : الشهادة لله عوض الله نشيط
ك1 : بدل ما يلبس قميص بكمام طويلة ويشمر
ك3 : بيلبس قميص بنص كم على طول
ك4 : وعنده مكتبة في الفلسفة والفولكلور
ك2 : وكان خبير في الشعب والأمثال
عوض : الشاطرة تغزل برجل حمار
ك1 : طب ما تألف لنا كتاب
ك4 : تحكي فيه وتتحاكي للأحفاد .
عوض : اطبخي يا جارية .. كلف يا سيد
ك3 : هو الغلبان منا حيلته إيه ؟
ك2 : [بلعب دور خواجة ويرطن] مستر عوض الله .. أنا عايز واحد كتاب يخلي دي يبقي حمار .
عوض : كل حمار علي قد عليقه .
[يستمر كلام الكورس مع عوض الله في الصامت، ويعلو في الطرف الأخر من المسرح في صالون النعيم صوت كاللو يحكي للزبون، وأثناء حكي كاللو يدخل الملك إلي وسط الميدان ويلعب أحد الكورس دور وزيره، مع ملاحظة أن شكشوكة تقدم كوب شاي بلاستيكي للملك]
كاللو : كان فيه بلد هبل تعرف باسم هبلستان ..
الزبون : هبلستان ؟
كاللو : آه.. هبلستان. حكمها إبليسى أول ثم إبليسى ثان.. ملا صالونى بنجف بنور على كريستال.. وجاب لي صبغة موسيقى اسمها ريستال، وعلمنا فن الغنى الأصلي.. أنا قصدي.. فن الغُنا الأصلي.. لحظة أقصقص دى [يقص للزبون شعره بينما يتلفت كاللو حول نفسه خوفاً أن يكون أحداً قد سمعه] وكان عوض الله أفندي عيل صغير شبه أبوه الخالق الناطق.. في الشكل بس، إما أبوه فكان راجل بحق.. صوته من راسه، وكنت أنا بأحلق له راسه.
الزبون : أبو عوض الله أفندي ..........؟
كاللو : ركز معايا.. وفي يوم من الأيام.. خلي بالك معايا هنا العقدة.. ندهه الملك، وكان ملك أعظم من العمدة، وعينه مضحك ولي العُهدة، وقال له .....
الملك : يا ألعب من القرموط .. تضحك الولد أعلي مراتبك.. تبكي الولد أقطع رقبتك.. أفهم كلامي وأمشي بالمظبوط.
[ك1 يلعب دور الوزير، وك2 يلعب ابن الملك، وك3 والد عوض الله الذي يحمل أراجوز في يده يلاعب به ابن الملك الذي يقوم بحركات تدل علي البلاهة والتخلف العقلي.. فيلقي الوالد بالأراجوز، ويذبح نفسه بسلاح أبيض.. يبكي الولد قليلاً.. يلتقط عوض الله الأراجوز، ويحاول مداعبة الولد الباكي حتى يسكت، والولد يقوم بعمل حركات سخيفة يستخدم فيها جسم عوض الله]
الملك : ايه ده يا وزير ؟
ك1 [الوزير] : ولا يهم جلالتك .. خاين وانتحر ..
عوض الله : عوض الله.. كاتب وصاحب رسالة وأمتلك مبدأ ..
الملك : عينه مضحك ولي العُهدة، واصرف له جراية شاي وطعمية. [يخرج يتبعه الوزير]
عوض الله : عاش الملك .. [يصفعه الولد] عاش ولي العُهدة.
كاللو : ومن ساعتها وأنا عندي جيوب أنفية.. وعنيا كما الحنفية ..........
ك2 [ابن الملك] : غني لي ..
عوض الله : أنا كاتب مش مغني.. [يصفعه، فيغني علي طريقة شعبان عبد الرحيم]..
المية في الربيع ... بتنـز من القرب
والليل داير يبيع ... النور جوه العلب
حادبح لك جوز حمام ... وأغني لك تنام
المية في الربيع ... بتنـز من القرب
والليل داير يبيع ... النور جوه العلب ... وهيه .... [يخرجان]
الزبون : احلق لى بشويش يا كاللو.. ده أنا أصلي مستعجل..
كاللو : أنا عندي لك صبغه سودا إنما سودا.. ع الموضة.. ماركة بعودة يا ليالي الاستعمار ..
الزبون : اديها للجنرال نوح اللي جاي وراك.. [يدخل نوح إلي المسرح يلتفت إليه كاللو] ..
نوح : مش قادر أفهم ليه النحاس باشا لغي المعاهدة اللي عملها هو بنفسه.
ك4 : وفجأة الدنيا ليلت..
ك2 : ما هي أصلاً ليل.
ك1 : والضي شعشع..
ك3 : والشجر سلويت..
ك4 : والحبيب قابل حبيبته..
الكورس : تيرا تيرا .. تيرا رارا رارارارا .. [نوح وشكشوكة يلتقيان في وسط الميدان علي أنغام الموسيقي (اللحن الأساسي لموسيقي Love Story) التي يعزفها الكورس بأفواههم] .
ك1 : شكشوكة عنيها بترعش من جمال المنظر..
ك3 : ونوح بيبلع ريقه، والصوت راح منه..
ك4 : لكنه قدر يغالب ضعفه..
ك1 : ولسانه انطلق.
نوح : خليكي هنا ويايا.. هتروح فين تاني.
ك3 : اتلفت له المستبدة.
شكشوكة : ياااااااااااه.. ده إحنا بقينا في أخر الدنيا.. شوف لك حته ناشفة تنام فيها يا راجل.
نوح : يا لابسة من تحت الودع تّنورة.. يا معسلة ذي القمر في الشمس.. يا أم الليالي الدافئة الـ........... .
شكشوكة : هتقلب جد يا مسكين.
نوح : يا ريتني أعمي وأشربك باللمس.. والاّ ..................
شكشوكة : ولع لنا سجاتين، خلي الكلام يحلو.. [تجلس خلف نصبة الشاي]
نوح : سجاير!! أنت عايز بابا يضربني ..
شكشوكة : هو أنت لسه بتروح المدرسة يا توتو؟
نوح : وبرجع من المدرسة أدلع..
ك1 : البنت كانت جنياية..
ك3 : والولد جني..
ك2 : وأنا حاوي
نوح : نورت الدنيا يا أمورة .
شكشوكة : دا أنت اللي ولد أمور.. خد المراية.. بص.. شوف الوسامة ..
نوح : يسلم لي بقك اللي بينقط شاي وقهوة وينسون.
ك4 : الدموع في عنيا مش نازلة..
ك2 : أصل الحب فظيع لما يبقي مغازلة..
شكشوكة : هتقلب جد يا مسكين.
نوح : يعني أجيب نينا ونيجي نزوركم بعد العصر؟؟
كاللو : وبعد إبليسي ثان جالنا إبليس ثالث.. علمنا فن الكاكولا وفن الاستنعاش.. والقعدة ع الكوبرى والشكشوكة والرعاش.. أما إبليسي رابع، فابنه كان وزيره.. ولي العُهدة وله فوازيره
الزبون : والفوازير دي بتتحل؟
كاللو : يا ريت.. طب خد عندك دي.. أسنسيرات المفاعل النووي قاعدة بتفبرك؟
الزبون : عروستي.
كاللو : قدر في يوم إن السحاب بقى زي الجمل يبرك.. والكمبيوتر هيجعل من بيوتر كوم.. يبقى ايه؟
الزبون : دي فوازير ابن الملك صعبة.
كاللو : علي الطريق لولايته في كل متر علامة استفهام.. دي فوازير ابن الملك.
الزبون : واللي بيحلها بياخد ايه؟
كاللو : مش هو اللي بياخد.. هما اللي بيخدوه، ولهم طرق جديدة ونظيفة، احنا بقينا في عصر الحريات.. وشكشوكة بعد شوية هتبقي فنانة كبيرة، والفن استعداد ..
شكشوكة : [في مكانها بعد انصراف نوح] ألت وأعجن.. وأعجن وعمري ما اتعكنن.. دا اللي ما يضحك علي غيره بيتجنن.
كاللو : بس اللي بيضحك علي نفسه.. بيتجنا.
عوض الله : [وقد أحضر أوراقاً وجلس يكتب] واللي يتبع طريقتي يدخل الجنة، سناريوهات طازة، ومشهيات ست كوم.
الكورس : صو .. صو .. صو
ك2 : دوت كوم
ك1 : أسكت يا صوّ
ك2 : واسكت ليه؟
ك3و4 : احنا كتاكيت الفراندا.. ومرعبين من البرد ..
ك2 : شكشوكة القمر شاف ودناها عمل حلق..
ك1 : أسكت يا صوّ
ك2 : ولو كان شاف رجلها
شكشوكة : [ضحكة رقيعة] كان عمل خلخال يا عنيا..
ك1 : اسكت يا صوّ ..
ك2 : يا أخويا سؤسؤ.. مش عارف أسكت.. سكاتي غالي.. جوابي جاهز.. وردي آلي ..
ك1 : يا أخويا سئسئ
ك4 : سمعاً ودمعاً.. أنا توبت خالص.. لا هملت ألعب.. ولا سحلب أشرب..
ك1 : يا أخويا سأسأ..
ك3 : السكوت مريح.. صحي بصحيح.. م البرد خايف، ومن القفص مرعوب.
كاللو : كراماتك يا شكشوكة ..
عوض الله : نهار خارجي.. الفراندا فاضية.. علي الحبل مشبكين فاضيين.. علي سور الفرندا حمامتين يتبادلان الحب بخفة وظرف، صوت موسيقى صاخبة، وكلب يعوي في الفضاء هووووووووووووووووو ................. . [الكورس يخافون]
شكشوكة : مجنونة!! مين يقدر يقول عليا كده؟ أنا عاقلة وسايبة العقل بمزاجي، الفنان لازم يكون طاقق..
ك2 : هَوْهَوْ علينا الكلب
ك3 : أول ما هَوْهَوْ صحينا
ك4 : أخر ما هَوْهَوْ نسيت
ك1 : افتكرته كلاب كتيرة ، جوبت عليها كلاب
شكشوكة : باتكلم واتحرك ، ولا أفضل فنانة في الوسط ..
كاللو : كأنها كانت فنانة بنت فنانة
ك2 : معاك لبانة
ك3 : في الجو ريحت كلاب
ك4 : لأة .. ريحة أنفلونزا
ك2 : في الجو ريحة زبالة لازمها الحرق .
شكشوكة : وعاملة نفسي مش واخدة بالي.. بس عينّا علي ابن الحلال.. أبقي مجنونة قال؟!
عوض الله : [يكتب] ليل داخلي.. الكاميرا تقوم بحركات تعبيرية تعبر عن الخوف.. موسيقي خافتة.. عواء ذئب.. عوووووووووووووووووووووووو .............. .
ك4 : مش قادر .. هرجع أمثل تاني ..
ك3 : بلاش ..
ك1 : كفاية اللي صابنا ..
كاللو : ابن الملك بعد ما خلصت فوازيره، وأبوه الملك فيص من مناخيره.. أصبح وأمسا علينا ملك من غير فوازيره، وسبحان المولي كان ماشي في قصره، قام هبه اتزحلق وقع علي ................. .
الزبون : فوازيره ؟
كاللو : لأة .. ودانه يا فالح ..
شكشوكة : والعرايس رايحة جاية.. وماحدش عاد بيسأل عليا.. غير المنيل علي عينه الجنرال نوح.. عايشة غريبة.. وقطع لسان اللي يقول عليا بنت ليل [ضحكة رقيعة].. [ك4 يقوم بأداء مشهد صامت مع شكشوكة] ..
عوض الله : [يكتب] الكاميرا رايحة جاية بين الفراندا الفاضية والميدان اللي مليان ناس حزينة بدون سبب، يدخل ولد يحمل وردة بيضاء أو حمراء أو صفراء.. وردة والسلام ويركع علي ركبته أمام الفراندا الفاضية في صمت ثقيل.. هس س س س س ..
ك4 : أشريفة أنت ؟
شكشوكة : أخرص.. أنا أشرف من أمـ.......
ك4 : أجميلة أنت ؟
شكشوكة : وهو فيه أجمل من كده !! [تستعرض جسدها]
ك4 : إذا كنتِ شريفة وجميلة، فإن شرفك ينبغي أن يصون جمالك ..
شكشوكة : أنا باستعمل كريم أكايا فيديو كريم ..
ك4 : إن سلطان الجمال يمسخ الشرف، فيُحيله داعراً بأسرع مما تستطيع قوة الشرف أن تحول الجمال إلي شرفٍ مثله..
شكشوكة : يعني أيه يا روحي؟؟
ك4 : ذلك قولٌ كان يبدو متناقضاً ذات يوم.. لقد أحببتك يوماً ما ..
شكشوكة : ودلوقت يا عنيا؟
ك4 : أذهبي إلي ديرٍ من الأديرة.. فنحن أنذالٍ أوغادٍ كلنا.. لا تصدقي أحداً منا.. اذهبي إلي الدير.. اذهبي.
شكشوكة : دير إيه؟! أنت اتجننت؟! [تغضب وتحاول الخروج من المشهد التمثيلي]
ك4 : [بعنف] لقد سمعتُ ما يكفي عن زيف وجوهكن.. منحكن الله وجهاً واحداً فصنعتن له وجهاً أخر.. هِزةٌ.. تأوُّدٌ.. لثغةٌ.. وتسمين مخلوقات الله بأسماء من وضعكن، وتعتذرن عن الخلاعة بالجهل ............. [يتدخل باقي أفراد الكورس]
شكشوكة : ايه ده؟ ده بيمثل ولا بيتمرن؟
ك1 : ما علش أصله سنة أولي تمثيل.. [ك4 مازال يؤدي لكن بفرده]
ك3 : لسه ما فاقس من البيضة ..
شكشوكة : [يظهر نوح الذي تراه شكشوكة] وأزاي يا أساتذة تجيبوا كتكوت لسه فاقس من البيضة يقف قدام نجمة كبيرة زيا !! [تخرج يتبعها أحدهم .. ك3]
عوض الله : [يكتب] الكاميرا تغوص داخل الفراندا.. التصوير من منظقة حساسة.. المنظر ثابت تحت الشجرة.. الحركة علي شريط الصوت كأن في راديو بيعيط..
كاللو : شكشوكة داخت سنة، ومسك البداية ختام ..
نـوح : [ وهو يهرول ليلحق بشكشوكة ويساعده ك1 ] وأدوخ وراها أنا.. وأشوف معاها الويل..
الزبون : احلق لى بشويش يا كاللو.. ده أنا أصلي مستعجل..
كاللو : دي شوشة بيضا ولازمها صبغة ليل..
ك1 : كاللو قعد يحلق له كده بشويش.. كده بشويش..
ك4 : لحد ما ولاد أخويا أتسرحوا من الجيش..
ك3 والحج مرسي خَلَف خَلِفْ خَلَفْ مرسي..
ك1 : وساكن الدوران قاعد علي الكرسي ..
ك4 : وكاللو في الدكان بيقول له ..
كاللو : بشويش عليه با كاللو.. أصله مستعجل..
عوض الله : نهار خارجي.. الكاميرا تغادر الفراندا.. إلي سموات فيراني وغيطان فذدقي، تنـزل أسماء الفنانين.. [يجمع أوراقه] الفيلم بقي يجنن..
[يدخل أفراد الكورس ، ويتجهون إلي ك2 الجالس منذ فترة وحيداً]
ك3 : مالك يا صوّ ..
ك1 : في ايه؟
ك4 : زرعتها فجل طلعت كوسة....... ها ها ... ها ...... [يضحك جميعهم بينما ك2 مازال صامتاً لا يضحك]
ك2 : بتضحكوا؟
ك3 : طب وهنزعل ليه؟
ك1و4 : إحنا كتاكيت الفرندا ..
ك3 : وأخونا عوض الله خلص الفيلم ..
ك1 : وطلع بيه علي المخرج يجري ..
ك4 : وخد حتة شلوت.. [يضحك]
ك3 : السيناريو ما عجبش شكشوكة
ك1 : أهي طلعت بتفهم..
ك3 : بس يا تري عوض الله هيعمل ايه؟
عوض الله : [يدخل] سياسي فصيح.. في الحزب أصيح، وفي المجلس أصيَّح، وأفضل اطيح بأمر مولانا الكسيح.. [يخرج]
كاللو : والملك بعد ما وقع علي ودانه ما عدشي بيسمع أي حاجة.. قام واحد ثورجي عامل ثورة عليه من غير ما يسمع. وبين ليلة وضحاها أخذ الثورجي المملكة والقصر والكرسي.. وفضل الملك في الشوارع يلف ويدور ..
ك1 : [لـ ك2] في ايه يابني مالك؟؟
ك3 : مكسور جناحك كده ليه؟
ك2 : أصلي افتكرت ماما.. [يعم الحزن علي الكورس] فاكرين؟.. [صمت] كانت نازلة الميدان وقلبها علي كتفها.. و...
ك3 : ومرات الأفندي قالت ..
ك1 : نفسي في فرخة ..
ك4 : قال الأفندي أجيب فرخة منين ؟
ك2 : قامت ماما بقلبها الرهيف
ك1 : الحنين ..
ك3 : فعلاً .. ماما كانت حنينة ..
ك2 : قامت ماما قالت
ك4 : أمرك يا سي الأفندي ..
ك3 : وراحت طايرة وحشرة نفسها في القفص ..
ك1 : حالت الأفندي صعبت عليها ..
ك2 : بس بعد ما الأفندي شال القفص ورجع لمراته ..
ك1 : وعياله السته
ك2 : ماما قعت تفكر في خبيتها
ك3 : بس من غير ما تقول يا خبتي ..
ك1 : آه .. من غير ما تقول يا مصبتي ..
ك4 : في النهاية ماما راحت في داهية .. أيه اللي فكرك بيها ؟
ك2 : هو في حد ممكن يعوز يتنتف ويتشوي، ولا يتحط علي النار في ماية سخنة يتسلق، يمكن يستوي..
ك1 : لأة..
ك4 : أيه فكرك بيها؟
ك2 : مين اللي ممكن يبخر العشة دلوقت؟
ك3 : أي حد يا أخي.. هي شغلانة !!
ك1 : وأحنا هانبخر العشة ليه؟
ك2 : أصلي سمعت في النشرة أن الطيور اليومين دول بيجلهم انفلونزا .
الكورس : انفلونزا ؟؟!! [يخرجون جرياً]
كاللو : وطبعاً عوض الله كان خطيب الثورة برضه ..
الزبون : خطيب ولا كاتب سيناريو ؟؟
كاللو : خطيب ومفوه كمان.. وفي مرة فقعنا خطبة.. اللى ما سمعهاشى.. ما سمعهاش ..
الزبون : يا سلام!! [يدخل عوض الله ومعه منصة بمكريفونات والكورس يشخص صحفيين ومستمعيين له]
كاللو : بس أنا حافظها كلها بالنص.. وكل كلمة باخدها وبتاخدنى مقص ..
عوض الله : الفنُ أرذلُ مما ليس بالأرذل .. فلتدل بالدلو، أو فلتدل بالجردل ...
الملك : [يدخل] بتقول ايه؟ أنا كنت ملك.. أيوة.. كنت ملك في بلاد كانت شوارعها ما تخلاش من الناس.. ناس تلعب الحجلة، وناس تملا القلل وما تشربهاش.. وناس بتاكل بامية، وناس ما بتاكلهاش.. وناس بتتجوز وتخلف، وأنا عليهم ملك، وولدهم يتجوزوا ويخلفوا، وأنا برضوا الملك.. وكله ببلاش.. شفتوا ملك كده زيي أبداً.. بس كان في ناس في الشعب بتاعي جاحدين، مش قابلين مني التضحية، بيمسكوا في الصغائر، اتلموا حولين ولد ثورجي.. ورفعوا لواء العصيان ضدي أنا.. [يدخل الثورجي وخلفه الكورس]
الثورجي : أسمعني أنا أطرش زيك..
الملك : بتقول إيه؟
الثورجي : هتعلي صوتك راح أعلي..
الملك : بتقول إيه؟
الثورجي : ظلموني باقول لك ظلموني.. حكموا علي وأتهموني..
الملك : طبعاً ممكن نتكلم مع بعض بس من خلال القنوات الشرعية.. أنا هاعملكم قنوات شرعية جديدة..
الثورجي : علي نارها سخنت حديدة.. تقصد ايه؟ تعبنا مش هايروح ع الفاضي.. والمستقبل لولدنا بالألوان.. مش أبيض وأسود.
الملك : تصوروا!! ضدي أنا الملك.. الولد الثورجي يهتف.. والشعب يهتف ضدي وراه.. لغاية ما لقيته فجأة قدامي.. [يصبحان وجهاً لوجه] ..
عوض الله : إن كان عندك رأىٌ أو سواه فقل.. لكل رأىٍ سواه يا أخا عوكل. مشاهدُ العينِ أحلامٌ مسافرةٌ.. هل ينفعُ المرءَ أن يغتالَ أو يقتل؟!
الثورجي : أنت ملك ولا حلاوة؟
الملك : يا شعبي بالهداوة.. أنا برضو الملك.. ومقدر حبكم ليَّ..
الثورجي : مش عايزينك.. مش عايزينك.. زيح اتاخر فسح زيح.. زيح اتاخر فسح زيح [يدفع الملك ويجلس مكانه علي العرش الوهمي الذي هو عبارة عن الجردل الذي يحتل منتصف الميدان].
الكورس : إحنا معاك يا فصيح .. إحنا معاك يا فصيح..
الملك : [ينهض الملك] كنت فاكر إنهم بيغنوا لي.. أنا الملك حدفوني من الشباك، زي لعيبة الكورة لما بيحدوا الكورة بيعيد عن الجون علشان يشلوا الشعب بأوامري أنا الملك.. وهافضل ألعب بالكورة والصولجان.. أنا أصلي كنت الملك..
عوض الله : الحظُ يطرقُ باباً ليس يعرفه.. فافتح له البابَ، أو فافتح له المندل. ففتح وففتح.. تساوى.. ففتحين.. وقد يستطلع الرأي أحياناً ويستنـزل. قد كان للأمس يومٌ سابقٌ غده، وكل قولٍ غريبٍ قبلَ أن يُعقل، فلا تجادل، فيغلبك الذى أجهل.. ويختطفك، وأنت الأعلمُ الأجدل. الأهلُ يصبحُ ضيفاً حين نذكره، والضيفُ يُصبحُ أهلاً حين يستقبل. والظلمُ ظلمٌ، فحسك.. تنتظر أظلم. والعدلُ عدلٌ، فحسك.. تنتظر أعدل.
كاللو : عوض الله خلص كلامه ودبت فى الوجوه دبه.. وريحة حلوة تفرقع فى البخور شبه. واللى هتف له هتف، واللى سقف له.. سقف له لما شبع، واللى مشى، ما مشيش، خطبة فحسك دى، فضلت جوه قلبه تعيش.. فاتت دقيقة، وفحسك أصبحت واحشاه، خطبة فحسك بتلعب جوه جوه حشاه.. خطبة فحسك دى كانت خطبة مش سكة.. دى خطبة كانت قصيدة، وخطبة كانت من معلقات العرب.. خطبة فحسك دى لسه فى ودنى بتجلجل...
الزبون : احلق لى بشويش يا كاللو .. ده أنا أصلي مستعجل ..
الملك : أنا كنت الملك، وبأمري أنا كان الوزا بيقتلوا بكره، وأول بأول يقطعوا موصلاته عن الناس، ويقيدوا بكره غايب في كل الخنات وفي كل الحصص، وفي نشرة الأخبار الأخيرة، كانت النهاية بتنـذاع علي الهوا .
الكورس : [يعزفون بأفواههم الحركة الثالثة من السمفونية السابعة لبيتهوفن]
ك3 : وزراء الملك يعلنون فشلهم في قتل بكره، والشعب يزيل سرادقات العزاء من المنازل..
ك1 : استطاعت شمس العمل أن تخترق سحب الغيم هذا الصباح، والشعب يخرج مبكراً للشوارع .
الملك : بس المشكلة إني ماسمعتش حاجة، كان لازم الناس ما تشوفش بكره، ولا بكره يشوفهم، علشان أفضل أنا الملك.. [يخرج]
الثورجي : بقدم فروض الولاء للناس من يومين، واتضح لي أن مش أنا والملك بس اللي كنا طرش.. الشعب كله كان أطرش.. صحيح بكره جه، والشمس طلعت، بس الشعب لسه أطرش، والطرش اللي عند الشعب ده نوع من التحايل علي وجع الدماغ، يعني يسمعوا اللي يعجبهم، واللي مايعجبهمش يدولوا طناش.. قال ايه.. طُرش. المهم إن الطرش كان عامل عمايله معايا.. مهما أقول في شعارات.. الشعب مش سامع.. جوه القفص مش سامعين، بره القفص مش سامعين، قمت رميت علي الشعب اليمين، ورفعت الجردل، ومشيت.. [يرفع غطاء الجردل ، فيخرج من تحته دخان كثيف ، يخرج]
ك3 : جاءنا هذا الخبر العاجل..
ك1 : اختفاء جردل الحكم في ظروف غامضة..
ك3 : عودة السمع للشعب.
نوح : [يدخل] قال ايه إحنا عدينا سنة ألفين!! وبقينا في سنة 2010، هزار ولا جد، مش مهم، لأني مش حاسس بفرق.. مش حاسس بحاجة. زمان كان في مهندس انجليزي وقف في الورشة يتباهي..
ك4 : دي ترس صنع في انجلند.. تقدروا تقيسوا الشرشرة بالملي.. ها ها ..
نوح : الأوسطي محمد قاله..
ك1 : أنا أقدر أعمل زيه..
ك4 : أنتي مصري تقدر تعمل زيه.. مستحيل.. خد عشرة يوم، وورينا يا مصري..
نوح : الأسطى محمد خد يومين، وحط قدام المهندس الإنجلزي أربع تروس، وقاله..
ك1 : الدور عليك يا خواجة، تقدر تطلع الترس المصري من دول؟
نوح : وقف المهندس الإنجليزي محتار مغلوب، كان مستحيل يقدر يفرق بينهم، وفي الأخر قطع الإنجليز ايدين الأسطى محمد الاتنين. كان زمان ردئ.. بتقولوا عليه زمان جميل، وطالعين لي في قولة الزمن الردئ، والزمن الجميل.. بس أنا شايف إن الزمن بقي ماسخ، ايوة الزمن الماسخ هو الزمن اللي مالهوش طعم ولا ريحة، كل ليلة فيه شبه اللي قبلها، وكل يوم فيه شبه اللي بعده، مش عارف رجليه ليه شايلاني لغاية ما عشت في الزمن الماسخ ده.. [تدخل شكشوكة] باصرخ كأني قطر مش فايت.. باصرخ كأن الدنيا مش سامعة والشمس مش طالعة..
[الكورس يعزفون بأفواههم موسيقي (Love Story)]
شكشوكة : نوح .. حبيب قلبي .. وحشتني ..
نوح : أنا دايخ ، وخايف أقع ..
شكشوكة : سلامتك ..
نوح : اسمك ايه ؟ كان اسمك ايه يا دبانة مش بتتهش ..
شكشوكة : ليه الغلط ده يا عم نوح .. قصدي يا جدو نوح ؟
نوح : انتي عاملة زي الصفيحة اللي جلدها مكرمش ..
شكشوكة : ما تفوق يا راجل وتشوف انت بتكلم مين ؟
ك3 : جرالك ايه يا عم نوح ..
ك1 : دي الحياة حلوة لو تغنيها ..
نوح : ما حدش هايعرف يغنيها زيي .
ك4 : خلاص نمثلها ..
نوح : مثلتها كتير .. ما حدش هايعرف يمثلها زيي .
ك3 : فين الأمل يا عم نوح ..
نوح : قول فين القبر .. ما تعرفش يابني عنوانه فين ؟ [وهو يخرج] الأيام اللي رايحة بتيجي .. الأيام اللي جاية تروح ..
شكشوكة : وادى حبيبى الكبير ادانى ضهره وراح.. وبكره حبيبى الصغير يبقى برضه كبير.. بس باين أن أنا اللي عجزت، نفسي أرجع زي زمان بجوز ضفاير، وكل شباب الحتة يعكسوني ويطلبوني.. فاكرين..
الكورس : صو صو .. صو صو ..
ك2 : إحنا فقدنا الذاكرة ..
الكورس : آآآآه .. وتوهنا كمان .
شكشوكة : [لـ ك2] مش أنت ليه صبي الجزار..؟ جيت أمته؟ وجبت لي ايه علشان تتجوزني..
ك2 : أسكتي .. مش أنا سافرت لكويت.. وبعد ما عملت تحويشت العمر.. أخوكي صدام دخل ما خلاش حاجة لحد..
شكشوكة : [لـ ك1] مش أنت بلية صبي الميكانيكي..؟ جبت لي أيه؟ أتكلم قول.. أنطق ..
ك1 : انا كنت جايب لك كل الأجهزة. أيشي غسالة.. وبوتاجاز.. وخلاط.. وكطبشن ماشين.
شكشوكة : الله .. جبت لي الكابشن ماشين..
ك1 : بس يا خسارة.. العبارة اللي كنت راجع بيها من السعودية .. غرقت ..
شكشوكة : والأجهزة؟
ك1 : خدها سمك القرش.. مش المهم اني رجعت بالسلامة؟
شكشوكة : [لـ ك4] مش أنت قدرة بياع البليلة؟ جبت لي ايه؟
ك4 : أنا هملت.. أمير الدنمارك.. ما أحقر مصيرنا!!.. إن الخيال ليستطيع أن يتتبع التراب العظيم.. تراب الأسكندر حتى يجده سدادة لثغرة في برميل.....
شكشوكة : خلاص يا خويا حقك عليا.. أنا مش هتجوز.. خلاص ..
ك4 : لقد قام في نفسي نوع من الصراع لم يدع لي فرصة النوم.. [تخرج شكشوكة] ..
ك3 : خلاص أحنا هنروح ، وابقي نام براحتك ..
ك4 : كان يخيل إلي أني أسوأ مضعجاً من بحار شُد إلي الأغلال ..
ك3 : خلاص مش هنجوزك شكشوكة ..
ك4 : لا بد أن ندرك أن طيشاً كثيراً ينفعنا حين يخفق يدبيرنا المحكم .. وعلينا أن ندرك من هذا أن هناك قوة سماوية تصوغ مصائرنا مهما تخبطنا نحن في صوغها ..
ك4 : تصدق أنك لازم تتجوز شكشوكة عقاباً لك ..
ك2 : علشان تحرم .. [يسحبوه كأنهم في زفة]
ك1 : يلا غنوا له ..
الكورس : صو صو .. صو صو .. نطوا بلاطة ودوسو بلاطة .. مشوا الزفة بكل ألاطة ..
ك3 : العدل اتجوز عدلية ..
ك2 : والرسمي اتجوز رسمية ..
ك1 : وابن دا هوه ..
ك2 : ابن داهيه ..
ك3 : والخلاط واخد خلاطة ..
الكورس : صو صو .. صو صو .. نطوا بلاطة ودوسو بلاطة .. مشوا الزفة بكل ألاطة ..
ك4 : الخلاط كان أبيض واسمر ..
ك1 : والخلاطة حجابها مشمر ..
ك2 : واشي بيطبل ..
ك3 : واشي بيزمر ..
ك4 : واشي بيقول لك تاتا .. تاتا ..
ك1 : قمنا بسرعة
ك2 : ما حدش طاطا ..
الكورس : نطوا بلاطة ودوسو بلاطة .. مشوا الزفة بكل ألاطة .. صو صو .. صو صو .. إحنا كتاكيت الفراندا
ك1 : أنا سؤسؤ
ك3 : وأنا سأسأ
ك4 : وأنا سئسئ
ك2 : وأنا صوّ
الكورس : إحنا كتاكيت الفراندا ، ومش خايفين نتوه .
ك1 : أنا سؤسؤ سمباتييك
ك3 : وأنا سأسأ في البوتيك
ك4 : وأنا سئسئ أسأليك .
الزبون : احلق لى بشويش يا كاللو .. ده أنا أصلي مستعجل ..

إظــــــــــــــــــلام

التعليقات