الأكثر مشاهدة

أخر المقالات

بيلي بامبيبنو - قصة للاطفال

الكاتب : كريم بهاء

الحياة كلها كروش !!! ..
كرش لبابا و كرش لماما ..
كرش المدرس و كرش المدرسه ..
كرش الناظر و كرش الداده ..
حتي عم سمير بتاع العصير .. هو كمان له كرش !!!
و حتي تيخه صاحب منصور .. عنده كرش ..
و كمان منصور .. شكله هيطلع له كرش !!!
الا انا من غير كرش !! ..
انا مين ؟ .. انا علي سيد ياسين .. طفل عنده تسع سنين ..
و على ما يبدو اني حزين .. لأني ..من غير كرش ..
في التلفزيون ..
بتغني داليدا .. مغنية مصرية .. بتغني بلغة فرنسية .. و الاغنية اسمها بامبينو ..
مش فاهم منها و لا كلمه .. بس حاسس انها حلوه ..
و في سريري و بعد المذاكرة الكتيره .. و اللعب على الكمبيوتر لشويه قليله ..
نمت في اوضتي بلونها اللبني .. و سرحت في الشباك المفتوح امامي ..
نمت بحلم اني اصحي الصبح .. الاقي عندي كرش ..
يارب .. نفسي في كرش زي كل الناس اللي عندها كرش ..
الصبح صحيت من نوم .. و قبل ما البس اي هدوم ..
لمحته ..
واقف على طرف الشباك .. فركت عيني بحماس ..
و بصيت للشباك المتغطيه حدوده بنور الشمس ..
و لقيت اللي لمحته .. اختفي ..
و برضه طلعلي تاني .. على طرف شباك تاني ..
بس المره دي في المدرسة .. و طبيعي المرة دي اسأله ..
انت يا عم .. ياللي شبه الكرش ..
ليه بطاردني ؟ .. رد و قالي : انا باطاردك ، مفتكرش ..
بسرعة حلقت عليه .. يمين و شمال حاوطه ..
لما حس بالحصار .. رد و قال انا غلطان ..
اني طلعت لواحد مش بيفهم في الكرش ..
رديت و قلت : خالص خالص .. انت بتفهم في الكروش ؟ ..
قال : يا علي بص لي .. دا انا عبارة عن .. كرش .. و كعادته اختفي ..
و بعد ايام ..
في اوضتي كنت بارسم بالالوان .. و لعبت رياضه كمان ..
و قبل ما اقعد على الكمبيوتر و العب .. لقيته .. عند نفس الشباك ..
يووووه انت تاني .. قلت له ..
قال لي و هو بيغيرني : عايز تعرف سر الكرش ..
بسرعة فرحت و سألته .. ايوه .. نفسي يبقي عند كرش .. زي كل الناس اللي بكرش ..
قال : يبقي تسمع مني انا .. انا ملك الكروش .. انا بيلي بامبينو ..
الكرش سره بسيط .. هيطلع بسرعه و بسهوله .. مع كل اكل هتاكله غير مفيد ..
كمل بيلي بامبينو و قال .. عندك مثلا الاكل الاي كلام ..
زي الساندويتش اللي معاه بطاطس و كوب كبير من مشروب .. بالسكر و الغاز مخلوط ..
هتلاقيه كمان في الشوكلاته الكتير .. و الحلويات بانواعها المختلفة ..
رديت انا باكل كل الحاجات دي .. و برضه مش بيطلع لي كرش ..
شكلك يا بيلي بامبينو .. لا بتفهم في الكرش و لا بتفهم في شروطه ..
اتخض بيلي بامبينو .. و قال .. يبقي الخطه التانيه على طول ..
بطل تلعب رياضه .. و بطل تنام في مواعيد مظبوطه ..
و بطل تصحي من النوم بدري .. و بدل ما يبقي في ميعاد محدد للفطار و الغداء و العشا ..
كل في اي وقت .. و في اي مكان ..
بيلي .. بيلي .. ناديت عليه بسرعه ..
اصله كعادته اختفي .. لكنه كان ضيف دايم في رسوماتي .. و في احلامي كان بيكرر زيارته
بيلي بامبينو .. ملك الكروش ..
و في يوم على الشباك كان واقف من جديد .. اصله قرر يزورني ..
عشان يقولي : احنا صحاب يا علي .. و الصحاب تجوز بينهم النصيحة ..
ابعد يا صاحبي عن الكرش و غني له ..
قلت له : ليه ؟ .. دا انا خلاص بطلت رياضه ..
و الاكل بقي من غير مواعيد .. و الشوكلاته مش بتفارق الشنطه ..
بيلي بامبينو كان شكله عيان .. و دايما بينهج و سرحان .. و بصعوبة كان بيجمع الكلام ..
و بيقول : يا علي ..انت صح .. انت كنت في امان ..
لانك لما تلعب رياضه .. و تنظم مواعيد اكلك ..
هتحافظ على جسمك .. و صحتك تفضل في امان ..
اما انا .. فانا تعبان .. و طلعت حكايه الكرش دي اي كلام ..
اوعي يا علي من الكرش .. و خلي بالك .. كل اللي عنده كرش .. هتلاقيه تعبان ..
صحيح يا بيلي بامبينو ..
بابا عنده كرش .. و تعبان .. بينهج اول ما يطلع السلم ..
اما ماما .. فبتحب النوم كتير .. يمكن عشان عندها كرش و بتتعب من المجهود
طب و عم سمير بتاع العصير .. دا بيشتغل شغل قليل ..
و لما حد يطلب منه يجبله حاجه .. يكسل و يقول مقدرش ..
و يسيبه يجيب حاجاته من التلاجه ..
اما المدرسين .. دايما قاعدين .. و تعبانين .. و ساعات في الحصص نايمين ..
طب تيخه صاحب منصور .. و كمان منصور
انا فاكر انهم زي حالاتي .. بيحبوا لعب الكوره ..
لكن انا اقدر اجري و الحقها .. اما هما ..
فبالكرش ملخومين .. و على الجري مش قادرين ..
ساعتها عرفت اني صح .. تنظيم الاكل مهم ..
الفطار في ميعاده .. و كمان اول ما ارجع من المدرسه استمتع بالغدا ..
اما العشا .. فقبل ما انام بساعتين .. و محرمش نفسي من الشوكلاته و الحلويات ..
ليهم برضه ميعاد ..
في الفسحه ممكن ساعات ..
و بعد العشا ممكن اكل ايس كريم ..
اما الرياضه .. فحاجه سهله و لطيفه .. و شويه تمارين بسيطه ..
تحافظ على جسمي .. و يبقي شكله حلو ..
و من غير كرش ..
و قررت انا ..
علي سيد ياسين ..
اني مش هابقي زي الناس التانيين .. اللي عن صحتهم مستغنيين .. و بالكرش مهتمين ..
و اللي هاقدر انصحه منهم .. زي ما بيلي بامبينو عمل معايا
هاقوله ..
و بدأت بصاحبي تيخه و صاحبه منصور ..
و خليتهم يقولوا للكرش .. غور ..
بيلي بامبينو .. زارني مرة اخيره ..
و كان تعبان و في عينيه غيره ..
لاني قدرت انسي الكرش .. سلم عليا و ودعني ..
و في التلفزيون .. كل ما اسمع اغنية بامبينو لداليدا ..
افتكر اد ايه الحياه فيها حاجات مفيده .. غير الكرش ..
باي باي بيلي بامبينو ..
و باي باي يا كرش ..

التعليقات