الأكثر مشاهدة

أخر المقالات

يبقى انت اكيد في مصر

الكاتب : sally adel


مش عارفة الحقيقة انا ليه بيحصلي كدة؟!!! بس والله بيحصل, يمكن تفتكرو اني ببالغ بس لا يا جماعة دي حقيقة،ولما نجمع الحقائق دي مع بعض نستنتج حاجات كتير على راسها ان اكيد في لعنة بتطاردني او ماشابه ذلك ودة اذا كنا مؤمنين بالخرافات...استنو بقى هحكيلكو حكاية جديدة

الحمد لله تليفوني رن في صباح احد الايام لقيت شاب صوته جميل ومنظم كدة روحت مصحصحة وفايقة..احمدك يارب انا نايمة بحلم بعريس اصحى الاقي العريس بيتصل يافرج الله،بس طبعا فوقت من احلامي السعيدة على الحقيقة المرة ان دة مش عريس ولا حاجة دة موظف من شركة ما بيبلغني بميعاد الانترفيو،قلت مش مشكلة النهاردة يعمل انترفيو بكرة يبقى عريس واهو الواد صوته حلو ويمكن الحظ يضرب معايا ويطلع شكله حلو ومش مرتبط وبكدة اتعين وانجوز في نفس الوقت احمدك يارب...

الواد الحقيقة صوته حلو بس اكتشفت انه غبي شوية اداني عنوان رهيب غريب مالوش اي مواصلة قلت مش مشكلة هسأل والي يسال مايتوهش..........بس في مصر الي بيسأل اكيد هيتوه

قمت بدري طبعا عشان اظهر في شكل الموظف المنضبط علما بان عمر ماكانت مواعيدي مضبوطة وطقمت بدلة فورمال وكعب عالي رايحة انترفيو بقى معتقدة ان الموضوع بسيط واني هلاقي مواصلة راكنة في اخر السرير بتاعي وهتطلعني لحد المكتب لكن الحقيقة غير كدة خااااااااااالص...

اتمخترت لحد ميدان الجيزة عشان اشوف حاجة رايحة الزمالك وطبعا الزمالك منطقة راقية مايصحش يكون ليها مواصلات عشان عامة الشعب مايقدرش يدخلها ومن هذا المنطلق مسموح بدخول اصحاب السيارات والاجرة فقط فطبعا مالقتش قولت اما اسال،ميلت كدة على واحدة ست واقفة وسالتها ردت عليا بعصبية وقالتلي"مش عارفة ماعرفش الزمالك انا عمري ماروحت الزمالك,هي الناس جرالها ايه؟لاحول ولاقوة الابالله لاحول ولاقوةالابالله".......الله!!!!مالها الست دي؟دة ولا اما اكون سالتها على مكان مشبوه!! وبركز كدة شوية حاكم انتو عارفين اني عندي مشكلة مع التركيزلقيتها الست الي بتبيع عيش...قلت لنفسي ايه الغباء دة هما الناس ناقصين استفزاز زمالك ايه بس دي الست بتبيع عيش وتلاقي في بيتها مافيش رغيف عيش،لا كدة انا هعذرها الغلط عندي
قلت خلاص انا هسال واحد شكلو موظف يمكن يعرف،لقيت شاب حلو كدة لابس بدلة ونضارة وماسك شنطة قلت اكيد رايح الشغل اما اساله بقى،قولتله"لو سمحت ماتعرفش اسهل وسيلة مواصلات توديني لاقرب مكان للزمالك؟"الواد تقريبا افتكرني من التلفزيون راح عادل الكرافتة والنضارة وبدا يبحلقلي في غباء كدة وقال"دة نفس طريقي يافندم خليكي معايا وانا هركبك"فرحت اوي قلت الحمد لله مصر لسة بخيروشبابنا زي الورد،وسمعت صدى صوت شادية في ودني بتغني اغنية يا حبيبتي يا مصر يا مصر وخصوصا مقطع ماشافش الرجال السمر الشداد فوق كل المحن،وسرحت وتخيلت كل الشباب الي اعرفهم وهما راسمين العلم على وشههم وماسكين علم كبيييييييييييييير وبصين في الافق بشموخ وكلهم تحدي،ولسة الدمعة هتفر من عيني لقيت ميكروباص معدي الراجل بيقول "كيت كات كيت كااااااااااااااااااااات"وهوب الواد اتبخرعشان يلحق مكان،وماطلعش زي ماكنت فاكرة خالص،بس الواد كتر خيره خرجلي ايدو من الشباك وقالي في وسط الدوشة" يا انسة معلش اصلي متاخر اركبي كيت كات ولما تلاقي نفسك عند مسرح البالون انزلي وبعدين اطلعييييييييييييييي"واختفى الصوت لان الميكروباس اتحرك

طبعا الوصفة السحرية دي تحتاج الى قليل من التوضيح قلت اركب وبعدين اكلم الواد بتاع الشركة ابو صوت حلو واساله،ووصلت فعلا طبقا لوصفة الاخ الندل وكلمت الشاب ابو صوت جميل..اتنحنح كدة كانه هيغني"بصي اطلعي السلم وعدي الكوبري هتلاقي فندق ام كلثوم احنا خلف الفندق تماما عمارة رقم 14 شكرا يافندم"وقفل قبل مااستفسر عن اي حاجة

قلت مش مشكلةاطلع الكوبري واشوف...طلعت الكوبري وطليت من فوق الكوبري لقيت الست ام كلثوم واقفة بعظمة في وسط الشارع،قلت اهي الست اهي المكان مايتوههش الحمد لله،نزلت من الكوبري متبعة وصفة البيه الغبي متجهه للفندق وفضلت ماشية ماشية ماشية زي الي تاهت في الصحرا لا لاقية للفندق ضهر ولا لاقية نمرة 14
وفجأة لقيت نفسي في الصين...لقيت نفسي في مكان كله صينيين..احمدك يارب وصلت الصين وصلت الصين...ماكنتش اعرف ان العالم بقى قرية صغيرة اوي كدة يعني اخد ميكروباص للجيزة ومن الجيزة اروح الكيت كات واتمشى شوية ابقى في الصين؟وانا اقول مغرقين السوق ببضاعتهم ليه،ماهو الموضوع مابيكلفهومش نقل كتير يابلاش...
ايه دة؟عسكري مصري؟مصري ايوة دة العسكري بتاعنا المطحون الي واقف على رجله طول النهارولا عارف هو واقف ليه؟ولا بيقبض اخر الشهر غير 200 جنيه وبردو مش عارف ليه،المهم اني جريت عليه قبل مايتبخر قلتله"والنبي يا دفعة ماتعرفش نمرة 14 فين؟"بصلي اوي كدة وفضل باصصلي لدرجة اني شكيت انه يكون اتعرف عليا كاحد المشتبه بيهم وبعدين قالي"جالولك فين دي نمرة 14؟"قولتله"ورا الفندق يادفعة" وراح ناده لصحابه"يا محمد ياعوض ماتعيرفوش فين نمرة 14؟"وهنا خرج عساكر كتيييييييييير...الله مانتو موجودين اهه!!انا مش في الصين ولا حاجة!امال مستخبين ليه؟تكونش الصين احتلت مصر؟جايز ماهي بدات بالسيطرة الاقتصادية ودلوقتي دخلو البلد ..انا كنت حاسة ان دة هيحصل من زمان
المهم رد واحد كدة قالي"ليسة جيدام اتمشي شوي"

وفضلت ماشية ان الاقي نمرة 14 مافيش عارفين ليه لاني وصلت لاخر الشارع لقيت يافطة كبيرة مكتوب عليها اسم الشركة والعمارة رقم 27!!!لاتعليق
دخلت ولقيت الواد ابوصوت حلو راجل من دور جدي الله يرحمه وقال لما خلص الانترفيو بيقولي لو اتقبلتي هتعملي انترفيو تاني مع بابا...بابا!!!انت لسة ليك اب؟دة انت معدي ال60 يعني اذا كان ليك اب هيكون في ال90 هيعملي انترفيو ازاي يعني؟يمكن هيسالني في التاريخ يمكن!
قلت اساله كدة على مواصلة سهلة اروح بيها قالي"بصي يابنتي اخرجي من الشارع يمين في شمال في يمين هتلاقي النيل عدي واركبي للجيزة"اعدي النيل؟ولا كاني سمعت حاجة انا هروح زي ماجيت بس وقفت كدة قدام العمارة شويةافكر..اعدي النيل؟يمكن في كوبري،او عوامة انا لازم اشوف بنفسي

ودفعني فضولي ان اتبع وصفته وافهم يعني ايه اعدي النيل ولو عديت هبقى فين؟ومشيت ووصلت لقيت يافطة كبيرة مكتوب عليها هيئة النقل النهري الاتوبيس النهري
الللللللللللللله الاتوبيس النهري نفسي طول عمري اركبه....وسرحت تخيلت اني سعاد حسني في فيلم خلي بالك من زوزو بالفستان الاحمر في ابيض ومعايا حسين فهمي واغنية يا واد ياتقيل شغالة حواليا...الله خلي بالك بقى من لولو انا نازلة
ونزلت قطعت تذكرةوانا بحلم بالاتوبيس وكل فكرتي ومعلوماتي عنه من خلال الفيلم متناسية انه في الاخر اسمه اتوبيس مهما كان شكله ومكانه وانه يتبع هيئة النقل العام،وجه الاتوبيس وجالي ذهول

الناس كانهم راكبين اتوبيس ماشي ع الاسفلت متشعلقين ع الباب وع الشبابيك وفوق الاتوبيس وخارجين من كل مكان..يالهوي انا لايمكن اركب دة شكله هيغرق في اي لحظة،وبعدين ازاي الناس يعملو كدة؟دة ممكن اي حد يقع..طب في الشارع لو وقع هيلاقي الي يشيلو لكن في الميه!!ماحدش هينزل وراه طبعا
ولقيت الناس بيزوقو بعضهم عشان ينزلو ناسين ابسط قواعد الامان ليهم ولغيرهم وطبعا لا الي طالع عارف يطلع من الي نازل ولا الي نازل عارف ينزل من الي طالع وماحدش مدي فرصة للتاني وكان الدنيا هتطير
خفت اركب،بصرف النظر عن سلوك الناس الاتوبيس يا جماعة فيه شق واضح للاعمىومتهالك،لالا انا همشي احسن،وفي ظل مانا منهمكة في افكاري لقيت واحد واقف على مقدمة الاتوبيس من برة بيقولي"بس بس ياانسة تعالي في مكان"وروحت ناطة والاتوبيس بيتحرك وبقيت على مقدمة السفينة....اه ماهي بقت سفينة انا والبطل على المقدمةوالسفينة شكلها بيقول انها لازم هتغرق تبقى اكيد تيتانيك

ووصلنا بعد مادمي نشف وجريت عديت الناحية التانية وانا مش عارفة المنطقة الي انا فيها بس لقيت قدامي قسم روحت واقفة قرب القسم...فضلت مستنية كتير مافيش حاجة بتروح الجيزة وقعدت اشتم نفسي اني بعمل في نفسي حاجات غريبة مالو الطريق الي جيت منه مش وحش يعني على الاقل ماشية في شوارع اعرفها ومش ممكن اتوه يارب ميكروباص جيزة
لاحظت كدة وانا واقفةمانتو عارفين اني بلاحظ كل حاجة:،ان في شاب بيبصلي
وعمال يقرب لحد ماجه وقف جنبي وبدا يتكلم روحت ماشية بعيد ودة ماشي ورايا وبدا يعاكس روحت واقفة قدام القسم وانطلقت"مش معقول كدة هما الناس المحترمة مايعرفوش يمشو بحرية وامان في الشارع!دي مش طريقة خالص، ماتحترم نفسك يا اخ انت ولا تحب ندخل القسم انا وانت"طبعا العساكر اتلمو زي مايكونو ماصدقو ومعاهم الشعب الكريم يهدوني وانا ابدا لازم ندخل القسم ماسكتش غير لما لقيت ضابط حليوة كدة داخل القسم شاف اللمة من غير تفكير قال للعساكر هتوهملي جوة اهي جت من عند الحكومة

دخلنا مع الباشا قعد وبصلنا وقالي"عملك ايه الحلو دة؟"قولتله"الاستاذ كان بيعاكسني بمنتهى قلة الادب"راح سرح كدة وبصلي بنظرة عميقة ومتاملة وفاحصة وقرب مني وهمسلي"ماهو بصراحة معاه حق"قلتله"افندم؟!!!!!"راح متدور ع الواد"وبتعاكسها ليه ياروح امك؟ماعندكش اخوات؟ ولا تحب حد....وبدا في عزف سيمفونية شتايم رائعة،وقالي"اتفضلي اقعدي،تحبي تشربي ايه؟"قلتله"شكرا"قالي"لازم تشربي حاجة اكيد الحيوان دة عصبك يا عسكري واحد لمون للانسة"
الله!!طب ماهم الضباط كويسين اهه مش زي مابيتقال عليهم يعني والقسم زي الفل وبنتعامل احسن معاملة اهودة بيضايفو المواطنين كمان امال بتوع حقوق الانسان حطينهم في دماغهم ليه بقى؟لازم حد من الشعب ينقلهم الصورة بنزاهة
بصراحة ضبطو الواد لدرجة انه صعب علياوبداو يكتبو المحضر قلتله"خلاص يافندم مافيش داعي انا مسمحاه"قاللي""لالالازم تاخدي حقك واذا انتي اتنازلتي عن حقك انا لايمكن اتنازل"قلتله"نعم!!!"قاللي"قصدي الحكومةدة حق الحكومةودة شغلي اكتب يابني عندك"
خلصنا المحضر وقلت اما اقوم بقى قالي"رايحة فين انتي لسه ماقعدتيش"قولتله"متشكرة يافندم"قالي"طب هشوفك تاني اكيد"تشوفني تاني!!!!!!!!!!!!!!!!!!!!!!!!!!!!!!!!!!!لقيت نفسي بضحك ببلاهة وقولتله"لو حد عاكسني جنبكو هنا اكيد هجيلك"قالي طب خدي رقمي لو في حاجة كلميني على طول ماتتردديش"
عمار يامصر............الشرطة هي الي بتتحايل على المواطن عشان تساعده،حقيقي انا مش مصدقة انا لازم اخرج اكدب كل الشائعات الي بتندد برجال الامن واعمل انا وصحابي رابطة محبي رجال الشرطة على الفيس بوك دول بيضايفو المواطن ويدوهم ارقامهم عشان يكونو في الخدمة دائما كمل كلامه وقالي"بس ياريت تكلميني متاخر شوية اكون رجعت من الشغل"متاخر!!!!!!!!!!!!!!!!!!!!!!!!!!وانا الي كنت بشيد بنزاهتك طلعت انت كمان بتعاكس...طب الراجل الغلبان الي ماشي في الشارع اخدته ع القسم طيب دلوقتي بقى واحنا في القسم اوديك فين؟ وخرجت من القسم خائبة الامل وتراجعت عن فكرة اني انقل الصورة بنزاهة عن واقع مش نزيه وطلعت الراديو وحطيت السماعة في ودني عشان لو حد عاكسني ماسمعش بس لقيت الست ام كلثوم بتغني"""""""اروح لمين؟ واقول يامين ينصفني منك""
عظمة على عظمة ياست

التعليقات