الأكثر مشاهدة

أخر المقالات

هوبليس ..كاس hopelesscase

الكاتب : خالد حمزة


هات لى واحد فى مصر الان يتحدث عن المستقبل. او يقول لك ولو على سبيل التمنى. حيعمل ايه بكرة ؟ .. كلنا يا صديقى فى الهم سوا. ولا تعايرنى. ولا اعايرك. ده الهم ..طايلنى وطايلك .
بعضنا مازال يتحدث عن مبارك. وعن زمن مبارك. والامن والامان والسكينة والاستقرار فى زمن مبارك. ومرات وولاد مبارك. والعادلى والشلة اياها. وبعضنا مازال يحن لزمن عبد الناصر. وكفاح ونضال البطل التاريخى الاسطورى الذى لايشق له غبار. واللى ما ولدتوش ولادة. وبعضنا مازال يعيش على احلام ويوتوبيا الشيوعية والماركسية. وطبقات الشعب العاملة. والعدالة الاجتماعية. وبعضنا يشط بفكره للفوضوية ومفيش سلطة ولا قانون وانا رئيس جمهورية نفسى. وبعضنا مازال عنده امل فى دولة الخلافة الاسلامية والجلباب والنقاب والحجاب والخمار وفرض الجزية والذى منه. وبعضنا مش لاقى ليها حل الا بحكم العسكر . وبيقولك ده انتو شعب نمرود مالوش الا كده. وبعضنا ما عندوش اى خيار وطول الوقت رافعلك شعار واحد وما بيغيرهوش : يسقط يسقط حكم العسكر. طيب والبديل يا مولانا . هو كده وخلاص. واغلبنا شاهد ما شافش اى حاجة. قاعد حيران كمشان تعبان ومستنى حترسى على ايه؟ّ. والظاهر انها حالة ميئوس منها. ولازم لها طبيب نفسى اى والله طبيب نفسى يعالج 90 مليون مريض بالفقر والمرض والجهل والرغى فى الفاضى والمليان . وعقدة احنا فراعنة انت مش عارف ولا ايه . وعلى كده حالهم اللى بيباتوا فيه بيصبحوا عليه.. يعنى هوبليس كاس يعنى بالعربى.
حاله ميئوس منها. والظاهر برده انه لا نافع معاها لا دستور . و لا انتخابات رئاسية ولا برلمانية. ولابدل.
الثورة ميت ثورة نصطبح بيها مع مطلع كل شمس. بس الناصح اللى يقوم بدرى الاول ويقود الثورة واحنا حنكون وراه كالعادة. برده ثوار احرار حنكمل المشوار وشعارنا هو هو مابيتغيرش : عيش. حرية. عدالة اجتماعية. او كما قال الزعيم الخالد سعد زغلول : مفيش فايدة ؟؟ّّ

التعليقات