الأكثر مشاهدة

أخر المقالات

بونكا نو هي

"بونكا نو هي" مش انجليزى ولا فيومي، لكن ده مصطلح ياباني يعني يوم الثقافة في اليابان.
ناس عندها اعتزاز بثقافتها وتراثها وكتابها، وعلشان كده بيحتفلوا سنوياً بيوم لثقافتهم.
ففي كل سنة، في يوم 3 نوفمبر، بيحتفل الشعب الياباني بـ"بونكا نو هي/يوم الثقافة"..
واليابانيين عندهم مهرجانات كتير، فتعقد المهرجانات في اليابان على مدار العام، وتكثر في فصول الربيع والصيف والخريف، والظاهر انهم بعملوا بيات شتوي، فماعندهمش مهرجانات في الشتا.
ومن المهرجانات اليابانية؛ قدرت اعرف شوية أسماء، منها : مهرجان "هانامي" والظاهر انه مهرجان يتعلق بالزهور.
وكمان في عندهم مهرجان"تاناباتا"، و"سيتسوبون"، ومهرجان "كاندا"، ومهرجان "بون"، و"جينجيتسو" يوم الإنسان وبيصادف 7 يناير، أما مهرجان"سانجا ماتسوري" فماعرفش عنه حاجة.
ومهرجان "العشبات السبع" ده عبارة عن عادة يابانية لأكل سبع عشبات خضر مع الرز المسلوق في يوم "جينجيتسو/يوم الإنسان"، أي سبع عيدان خضر ، ممكن يكون من بينهم الجرجير أو الفت أو الفجل؛ بس طبعاً الاسماء متغيرة. وطبعاً دي عادة يابانية قديمة مرتبطة بأكل سبع عيدان خضر في وقت تندر فيه النباتات الخضراء(فصل الشتاء المثلج)، وبيغنوا وهما بيكلو الرز المسلوق الغيدان السبعة الخضرا:(يلا ناكل العيدان السبعة الخضرا .. قبل ما تيجي طيور الصين).
أما الأسبوع الذهبي فهذا أسبوع مليئ بالمناسبات الوطنية، وهو بيبدأ من يوم 29أبريل وينتهي في 5مايو، ويوم 29 أبريل هو ذكري ميلاد الأمبراطور السابق "شووا"، وبيسموه اليوم ده بالياباني "شووا نو هي" يعني "يوم شووا" ، ثم يأتي بعده في ذات الأسبوع "يوم ذكرى الدستور" وهو يوم 3مايو، فبدأ العمل بالدستور الجديد كان يوم 3 مايو سنة 1947م؛ وعلى فكرة ـ وبالصدفة والله ـ أمبراطور اليابان صدق علي الدستور ده زي النهارده (3نوفمبر) سنة 1946م. أما يوم 4 مايو؛ فيا بخت اليابانيين بيه؛ فهو "اليوم الأخضر"؛ وطبعاً ده ما لوش علاقة بالكتاب الأخضر أو الشاي الأخضر؛ لأن "ميدوري نو هي/اليوم الأخضر" هو اليوم اللي بيعبر فيه اليابانيين عن تقديرهم للطبيعة. وأخر يوم في الأسبوع الذهبي هو يوم 5 مايو "كودومو نو هي" يعني يوم الأولاد، وفيه بيتمونى اليابانيون لأولادهم الصحة والسلامة.
وتصور ان السبب في تسمية "الأسبوع الذهبي" دي هما صناع السينما في اليابان، أصلهم بيستغلوا اسبوع الأجازات والناس بتروح السنيمات بكثرة فطبعاً بتزيد المبيعات، وبالتالي أربح صناع السينما ، فسموا الأسبوع بهذا الاسم ، وانتشرت التسمية.

المهم عايزين نرجع للموضوع بتاعنا، "يونكا نو هي".. يوم الثقافة في اليابان.. والموضوع فعلاً بتاعنا بس إحنا بنعمل مش واخدين بالنا!!
في اليوم ده؛ يقوم امبراطور اليابان بتسليم شخصية من الشخصيات اليابانية وسام الثقافة؛ وهو وسام من مرتبة واحدة فقط؛يعني لا فيه درجة أولي ولا تانية؛ ويمنح للرجال والنساء تقديراً من الدولة على مساهمات الشخص/المثقف ده في الفن الياباني أو الأدب أو الثقافة.
وعلي فكرة اليابانيين بدأوا موضوع وسام الثقافة دم من زمان، يعني من سنة 1937م ، وأول واحد ياباني حصل علي الوسام ده كان الروائي (كودا روهان)، واسمه الحقيقي هو (شيجه يوكي).
وعلي فكرة الوسام مش مخصص للأدباء فقط أو الفنانين ، لكن هنلاقي علماء كتير حصلوا عليه، ومنهم عالم الفيزياء (ماكوتو كوباياشي) ، وعلي فكرة منحوه الوسام قبل ما ياخد نوبل يجي بتلاتين سنة؛ منحوه الوسام في السبعينات وهو حصل علي نوبل سنة 2008 في الفيزياء 2008؛ لاكتشافه: أصل الكسر التلقائي للتناسق الذي يفترض وجود ثلاث مجموعات على الأقل من جزيئات أساسية مشحونة في الطبيعة. اللي عايز أقوله انهم ما استنوش غيرهم يكرم أبنهم علشان يكرمه ويقدره.. مش زي ناس ما بتفتكرش ولادها غير بعد ما يهجوا من البلد والغُرب يكموهم ويقدروه.
تحية لليابان في "بونكا نو هي"، وأخر الكلام اللي هنرجع نكمه بعدين:
"ياباني" في غير ملكك.. يا زارع في غير أرضك .. يا مربي في غير ولدك!!

التعليقات