الأكثر مشاهدة

أخر المقالات

هو انت كده بقى ...... فاكر نفسك راااجل !!؟ الجزء التانى

الكاتب : صهيب سليمان

أيوه أنا بكلمك انت ايوه أنت . علشان انت النموذج السيء ل الشاب السيء في أهم فتره و مرحله فى حياتك وهي فترة الخطوبه .
المقدمه :_
جمله بتتقال كتير فى مجتمعنا ( الشب الصايع في البيت ده أكتر واحد بيعرف يخاف على أهل بيته ) إيه السبب ؟
علشان صيعت ولفيت كتير وشوف كتير ورحت وجيت يبقى أنت كده الصح وكل الناس غلط قدامك!! , وتعمل راجل وتتحكم وتسيطر بحكم إنك كده بتخاف على اللي معاك يعنى !!! , والله اللي أنا اعرفه اللي عاوز يخاف على أهل بيته ويصونهم ويحفظهم لازم يبدأ بنفسه الاول علشان (كما تدين تدان) بس معليش الغلط برده مش عليك بنسبه 100 في 100 الغلط هرجع وقول هو خطأ تربية من الأول والبرمجه السابقه اللي انت اتبرمجت عليها زمان زى مكلمنا عنها بشكل كبير شويه في الجزء الأول من المقاله .
جمله تانى برده بتتقال ( أنا لو عندي بنت وعندي ولد هخاف على البنت وهحافظ عليها لكن الولد محدش يعيب عليه في حاجه يعمل بره اللي هوه عاوزه هو في الآخر راجل وهي بنت !!) يعنى أنتوا خايفين على البنت من كلام الناس ومش خايفين على الولد !!! , مش خايفين من ربنا لما يحاسبه ويحسبكم حرام عليكوا بجد والله .
ده حتى الرسول قال ( كلكم راع وكلكم مسئول عن رعيته ) .
هو ده مجتمعنا الجميل وده كان جزء من اللي بيحصل فيه وبذات في الفتره الأولي فترة الطفولة اللي تعتبر أهم فترة ممكن نربي ونهتم بيها ب أولادنا لأن بعد كده مش هنعرف نعمل معاهم حاجه ولا هياخذوا بي أي نصيحه بنقولها ليهم وقابل بقى ياعم لما الحلو يخطب ويرتبط ..........
* فتره الخطوبه : _
أول الخطوبه فسح بقى وخروجات وأحلى كلام يتقال وأحسن لبس وشياكه وعزومات مره عند أهله ومره عند اهل العروسه وبعد كام شهر كده بعد ما يخطب يبتدي يدخل في حياة البنت في كل حاجه ويحط شروطه إنت ميين صحابك ومتكلميش دي ومتتعمليش مع دي ورقمك ده هيتغيرر أنا مش عاوزك تعرفي إلا اللي انا شايفه كويس وبس وريني بقى الفيس بوك بتاعك والواتس آب والايميلات اللي عندك واديني الباس ورد كمان يله علشان انا عاوز أعرف كل حاجه عنك ولبسك ده مش عجبنى لازم يتغير أنا بغير عليكي جدا أنت هتكونى مراتى ولازم اخد بالي منك ومن كل تصرفاتك أصل أنا صيعت كتير بره وعرفت ناس كتير وعارف الناس بتفكر ازاي وهيقولو عليكي !! .
إيه ياعم حيلك حيلك أنت داخل حامي قوى ليه كده طب على أساس إيه يعنى هو انت كتبت عليها مثلاً انت مجرد خطيبها بس !! وحتى لو مراتك هو انت أشاريتها يعنى .
طب ياعم همشي معاك وهي هتسمع كلامك ومش هتعرف حد وهتغير رقمها كمان علشان خاطرك طب افرض إختلفته وفركشتهم مع بعض شكلها هي إيه طيب بعدها قدام الناس دي كلها ولا إنت بقى مش واثق في نفسك وحاسس إنها ممكن تكلم حد من وراك !!! طب قبل ما انت تيجي وتتقدم مكانت ارتبطت بأى حد فيهم ومكنتش وافقت عليك من الأول بقى !!! .
وعلى فكره موضوع أنك تاخد الباسورد ده عيب جدا لأنك كده هتبتدي تتسنط وتتجسس عليها في كل حاجه بتعملها والموضوع ده بيجيب ضيق نفسي عند الإنسان وبيتحول فيه الشخص للغيره القاتله , وربنا نهانا عنه في القرآن وقال ( ولا تجسسوا ) والنتيجه هتكون إن عمرك ما هتكون سعيد معاها ولا هي كمان هتكون على طبيعتها مع اى حد وهتكون خايفه الله يخربيتك هتجيب للبت عقده نفسيه منك يا أخي !!!! .
مش لازم تعمل كل ده على فكرة ﻹن عند مرحلة معينة من الحب والتفاهم بينكم هي مش هتكون محتاجه تسمع منك كل ده هي لما هتحبك وهتكون سعيدة معاك هتتشوف ايه اللي يرضيك وهتعمله من غير ما يكون في خناق ولا مشحنات ولا مشاكل خالص من النوع ده .
النفس البشريه لا تجبر على شيء هي ربنا خلقها كده ولازم يكون فيه تفاهم وإتفاق بينكم على كل الحاجات اللى بضايقك وبضايقها والإحترام برده مطلوب طبعاً في غياب أى حد فيكم لو كانت هي بتشتغل أو في الجامعة بتدرس او غيره .
زى ما انت هتخليها مبسوطة معاك وسعيدة هي كمان هتحاول تعمل اللي يخليك مبسوط وسعيد وهتكون مستعده تبطل اي حاجه بضايقك من غير أمر او إجبار على الشيئ أصل هو مفيش غير كده .
علشان هي لو سمعت كلامك علشان الطاعه من غير ما تقتنع وده الطبيعي أكيد لأن انت مختلف عنها وليك رأى وهي مختلفه عنك وليها رأى ممكن توفقك بس علشان هى زهقت وفاض بيها وعاوزه تخلص .
وممكن توافقك بس نفسياً مش مرتاحه من جواها وهتفضل تحوش وتكبت فى نفسها كل المشاكل والطاقه السلبية دي وهتلاقيها هتيجي في مره هتنفجر في وشك وهتطلع كل اللي كانت شيلاه منك .
*وأخيراً:-
أنا بس عاوز اقول حاجه فتره الخطوبه هي فترة تعارف مش أكتر كل واحد فيهم بيفكر يقرب من التانى أكتر يعرف شخصيته أكتر يحاول يفهمه ويعرف يتعامل معاه أزاي يتقبله زى ماهو ويوم ما يدخل في حياته يضيف لي حاجه جديده يحس أنه فعلا بيفيده والطرف الآخر يستفيد منه مش تتدخل في حياته وفي كل حاجه بيعملها وتقول انها مش عجباك ولازم تتغير أمال وفقت عليها ليه من الاول بقى !!! .
الراجل هو اللي يكون ليه كاريزما وشخصيه قويه ويقنع الناس بأسلوبه وبطريقته ويخليهم يعملوا اللي هوه عاوزه وهما راضيين وهما مبسوطين وهما مقتنعين بالكلام اللي هوه بيقوله ويحسوا أنهم فعلا بيستفيدوا منه مش يتبع أسلوب الإجبار والحكم والسيطرة
بحكم أن هو الراجل وخلاص !!! .
وفي الختام :_اذا كان ده نموذج سيء لشاب عمل كل حاجه غلط في حياته ووصل لمرحلة أنه لا يثق في حد خالص حتى خطيبته اللي هيرتبط بيها وهما الاتنين سابه بعض بسبب كل المشاكل دي
ياترى ممكن حد كويس يفركش برده هوه وخطيبته اه طبعا ممكن .
ياترى ممكن واحد ومراته بعد قصه حب كبيره ومنتهى التفاهم مع بعض وبعد فتره قليله من الجواز يفشكلو برده اه طبعا ممكن
الله طب ايه السبب؟ ........ وليه كده ؟ ده اللي هنعرفه انشاء الله في ( الجزء التالت ) من المقاله فتابعووووا معنا
( وبالله عليك لو مقتنع بيها متنساش تشير على صفحتك علشان توصل لكل الناس )
#صهيب_سليمان
https://twitter.com/soliman_sohayb
اللينكات http://www.youtube.com/watch?v=9BQkxbVaBM4http://www.youtube.com/watch?v=OnFOHrQW_Ashttp://www.youtube.com/watch?v=byEbABSchIUhttp://www.youtube.com/watch?v=cXs22GTDlR0http://www.youtube.com/watch?v=iPkhefR3-IM http://www.youtube.com/watch?v=cb7cfPOUNRc http://www.youtube.com/watch?v=TdSrHuKCK_8http://www.youtube.com/watch?v=9BQkxbVaBM4

التعليقات